Bela besampi, arapka Moses ulih ditemu

KUCHING: “Ngarapka anak aku ditemu selamat sereta gerai, munyi nya ku sampi Anita Sari ngagai anak iya Lans Koperal Moses Logers ti lenyau dalam siti operasyen di Pulau Perak, Kedah kena Hari Lima minggu ke udah.

Kenu ku Indai beumur 59 taun ti agi tekenyit ninga berita Moses lenyau pengudah macha ripot ba Suara Sarawak.
“Aku enda ngetu besampi ngarapka Moses ulih ditemu,” ku Anita.

Anita madahka anak tuai iya udah berandau enggau piak soldadu ngambi bulih berita pasal Moses.

“Aku berasai sinu, iya anak pengkuan ti dikemegah kami sebilik. Aku ngarapka iya ditemu agi idup,” ku iya lebuh dirandau Suara Sarawak.

Moses, 25, anak pengkuan ari lima menyadi asal ari Kampung Senibong, Singai enggau Koperal David Edmund Rapi, 29, asal ari Dalat lenyau dalam siti operasyen di Pulau Perak, Kedah kena Hari Lima minggu ke udah.

Pia mega, soldadu ke bebansa Bidayuh enggau Melanau nya gawa ba Rejimen Keempat Renjer Diraja, lalu kepenudi ditemu di blok endur bemalam di pulau nya urung pukul 5 lemai lbegulai belelak enggau bala bukai.

Nambahka nya, soldadu udah nambahka pejalai ngiga seduai tang bedau ditemu nyentukka diatu.

Pulau Perak tu sebuah pulau batu granit pemesai 1km ba tasik ujung barat Semenanjung Malaysia, ba tasik Selat Melaka enggau palan nyaga jelu ba tasik.

ARAPKA NUAN SELAMAT ANAK… Gambar Lans Koperal Moses Logers ti dikirum indai iya, Anita seraya minta semua bela besampi ngarapka anak pengkuan iya nya ulih ditemu enggau selamat.