Bela siti kluster baru di Kuching enggau Meradong

KUCHING: Opis Pengerai Nengeri Sarawak (JKNS) ngenukuka dua kluster baru iya nya siti kluster di Pelilih Kuching enggau Meradong.

Kluster Emperoh Jambu di Kuching nya ngaul Pelilih Kuching, Samarahan enggau Serian nya kluster komuniti ba Kampung Emperoh Jambu di Padawan, Kuching.

Indeks kes ngagai kluster tu iya nya kes ke-7,095 ngaul siku lelaki peranak menua beumur 45 taun ditemu positif sebedau nurun gawa kena 16 Februari tu tadi.

Pia mega, lelaki nya udah ngerampit sida sebilik lalu engka ngerampit kontak bukai maya pengawa rabat sepiak bini iya kena 3 ngagai 5 Februari tu tadi.

Naka pukul 12 tengahari tadi, bisi 337 iku udah diperesa ke alai 60 kes udah ditemu positif Covid-19 nyengkaum indeks kes, 40 kes negatif enggau 237 kes agi nganti pemutus makmal.

Semua kes udah dipasuk ngagai Sepital Besai Sarawak (SGH) enggau PKRC Kuching ungkup atur bukai lalu Kampung Emperoh Jambu di Padawan udah diterit Atur Mindah Betagang Diterit (PKPD) pengelama 14 hari ngambi nagang pengerekai Covid-19 tu.

Nambahka nya, Kluster Sungai Bakong di Pelilih Meradong, Sarikei nya kluster komuniti ngaul nembiak ke diau ba buding Murni di SMK Meradong semak Sungai Bakong di Pasar Meradong.

Indeks kes ngagai kluster tu iya nya kes ke-7,435 ditemu positif nengah pengawa meresa sida ti bisi kelai kena rampit kena 15 Februari tu tadi lalu bisi kelai kenyau ari 12 Februari tu tadi.
Naka pukul 12 tengahari tadi, bisi 593 iku udah diperesa ke alai bisi 22 kes udah ditemu positif nengah pengawa nyidi kes agi ngerekai di buding sekula nya nyengkaum indeks kes.

Nambahka nya, 37 kes ditemu negatif enggau 534 kes agi nganti pemutus makmal lalu semua kes udah dipasuk ngagai Sepital Sarikei enggau PKRC Sarikei ungkup atur bukai.

Semua pengajar, staf enggau nembiak ke diau bemalam ba SMK Meradong udah diasuh kuarantin enggau diau ba sekula aja.