Kenyau 9 November tu tadi semua sekula ba selampur menua Malaysia digerah Opis Menteri Pelajar (KPM) tutup, taja pia pengawa ngajar enggau belajar tetap dipejalai ngena chara baru iya nya belajar hari rumah.
Pemutus tu digaga KPM berindik ari pengerekai penyakit Covid-19 ke majak betambah sereta ngirauka ati bala indai nembiak. Nya alai ketegal ari atur nya semua kereja sekula semina dikirumka bala pengajar lalu ulih dipeda nengah laptop, komputer tauka telefon binhcing ngena aplikasyen bekaul baka WhatsApp enggau ti bukai.
Tu kebendar meri siti peneleba baru ngagai nembiak enggau apai indai. Ungkup raban nembiak ba sekula sekondari nyangka pekara tu enda bangat meri penanggul ngagai sida. Tang ba nembiak primari lebih agi nembiak macha satu ngagai tiga sida begunaka embing ari apai indai.
Nyadi pekara tu numbas iya meri pemar ngagai bala apai indai baka nyikap awak diri endur ngajar bala anak. Nyangka nadai penanggul nyema siku ari apai tauka indai nya semina kereja ari rumah.
Ungkup apai indai ti bekereja lelak-lelak baka ni pan sida mesti mih limpang ngiring enggau nunga bala anak belajar sampaika kereja sekula nya tembu.
Kebuah pia, laban genap kereja sekula anak endang dulu datai ba telefon binching apai indai. Jarang bala anak mit bisi telefon binching kediri empu. Pia mega, atur tu begunaka apai indai nyendiaka belanja ari sukut nyikap telefon diri enggau data internet.
Enti enda chukup data internet tentu nya meri pemar dikena ngulihka penerang ke dianjung bala pengajar ninting hari. Ngelansa penekul ke diasai bala nembiak di menua pesisir. Atur tu diperati nyadi penanggul besai ba menua ke bedau datai arus penyambung lebih agi ba menua ulu sungai.
Ambika chunto situasyen ke nyadi ba menua Lubok Antu, bepelasarka berita ke bisi ayan ba surat kabar sebedau tu ngayanka seraban nembiak begulai enggau apai indai sereta pengajar bejalai neresa sungai, babas enggau bukit laban ti deka ngiga palan ke manah endur sida ngulihka japai arus internet.
Nitihka data 2018, urung 15 buah rumah panjai ari tujuh sitak menua di Lubok Antu kala dirintaika bepanggul nadai servis arus penyambung nyengkaum di Skim Phase Batang Ai iya nya Nanga Pan enggau Pudai, Batu Kaya (Wong Panjai enggau Ensawang), Ulu Delok (Ulu Tapang Pungga enggau Nanga Sumpa), Ulu Lemanak (Nanga Puloh enggau Nanga Menyebat), Ulu Engkilili (Kumpang Langir enggau Kampang Paoh), Ulu kesit (Nanga Tiga enggau Sekunyit) sereta di Ulu Engkari (Lubok Pantu, Rantau Kemayau Manis enggau Nanga Sepaya).
Nyadi pekara tu beguna amat ke perati lengkas ari piak bekaul baka ni mutar penanggul ba kandang menua ke bedau bisi japai arus internet ke menyana.
Isu nadai internet endang nekul penekul besai ke patut diputar piak bekaul seraris enggau guna komuniti lebih agi jam diatu semua nembiak endang dipinta belajar ari rumah.
Penanggul tu bisi dibantai Presiden Gerempung Pengajar Sarawak Macky Joseph nengah sebengkah penerang kena 20 November tu tadi ke ngansak piak bekaul enda tau enda mutarka pekara tu ke pemaik semua nembiak di selampur nengeri.
Kebendar agi mayuh pemar bukai ditapi lebuh belajar ari rumah dibanding enggau nembiak ti belajar ba sekula. Kitai ngarapka pekara tu semina penguji sementara ngagai bala nembiak tauka bala anak kitai kebuah pia laban endur ke pemadu manah endur sida belajar nadai lebih ari sekula.
