PENGERANSING ngiga chara dikena nambahka penatai pemisi diri kelimpah agi nampung pelajar siti pengawa ke patut dichunto ngagai raban nembiak ke serambau.

Florence Franky, 19, dara bajik asal ari Saratok chukup landik ngaga produk pemakai manis dikumbai chocojar enggau nyumai.

Kelimpah ari landik nyumai Florence mega siku indu dara ti angkun enggau ngemerankan adat asal Iban iya nya nemu ngajat.

Lebuh dipinta nerang pasal pemun ngaga resepi kediri, Florence madah iya berengkah ngumpul resipi nengah internet sereta enda leju betanya ngagai bala bakih ti bepenau.

“Ari nya aku belajar kediri, nguji belubah-lubah nyentukka aku tetemuka resipi ti nyamai,” ku iya nusui Suara Sarawak.

Florence madahka, pengerindu ngaga chocojar berengkah laban iya empu siku orang ke chukup rindu makai pemakai ti manis.

DIGAGA MAYA LEPA

“Laban aku benung nyambung pelajar ba sebengkah palan pelajar tinggi, pengawa dagang tu dikereja aku maya bisi awak lepa dikena nambahka anak belanja diri.

“Pengelama udah ngemeranka tu puji Tuhan laban produk ke digaga aku bisi nerima sambut ari bala pemeli enggau seruran bisi orang meli.

“Enda disadang, udar bala pemeli enda nemu putus baka penganyut ai sungai,” ku iya.

Iya nusi, berengkah dikelala bala bakih diatu dagang nya udah ngerembai ngagai mensia mayuh nyengkaum bala bakih ba media rama.

“Nyema udar mayuh aku beguna awak dalam tiga jam tembu.

“Dalam sebulan urung 400 ngagai 800 butul ulih dijual aku laban peminta pemeli jam diatu sigi tinggi.

“Aku mega minta saup bala bakih bekunsika chocojar tu ngagai orang bukai ngambika mayuh agi orang meli,” ku iya.

PENGUJI SEMAYA BALANG

Taja pia, Florence madah dalam pengelama bejalaika pengawa tu bisi mega penguji tauka pekara ke endang ngelantang ati lebuh orang ke udah semaya deka meli nyau enda ingatka semaya diri tauka ngaga semaya balang.

“Lebuh chocojar udah tembu, enda memukai sida enda nyadi meli.

“Tu meh penguji kala ditapi aku laban ungkus dikena ngaga cocojar tu endang penuh ari aku empu, kira rugi meh aku dia.

“Taja pia, pekara enda ngasuh aku mantul ati tang nyadi peransang aku ransing agi bejalaika pengawa tu asil ari sukung diri bala bakih enggau diri sebilik,” ku iya.

Nangkan ke nya, ku iya, ngena kualiti chokelit ti tinggi entara penyelai dalam produk tauka kunchi ti ngasuh produk iya laku.

“Chokelit ti dikena aku disumai manah ngambika nadai pait tauka retung.

“Produk chocojar aku digaga bemacham chuan awakka muntang endur bala pemeli milih ni bagi bansa dikedeka sida baka asai chokelit pandan enggau ke bukai,” ku iya.

Florence ngarapka bala pemeli enda jera sereta nyukung pengawa iya tu belama.

“Kelimpah ulih nembuka pelajar aku mega ngarapka dagang tu terus maju.

“Aku pechaya enti kitai sigi angkun ngereja pengawa nadai pekara tauka penanggul ulih nanggul pengawa kitai,” ku iya.

Barang sapa ti deka ngudar pemanis tauka chocojar ari Florence ulih ngelawa facebook iya Florence Franky tauka page Flor’s Chocojar.