KUCHING: Perintah Sarawak deka terus fokus sereta nyendia belanja dikena ngemansangka sitak menua pesisir awakka semua rayat di nengeri tu bela ampit ngasaika pemansang.
Adun Machan-PBB Allan Siden Gramong madah, tu beduduk ari agih belanja ari Perintah Besai enda ulih dianti.
“Pakatan Harapan langsung nadai meri pengadang. Semua semaya dalam manifesto enda ulih dikeamat.
“Baka ke ditemu mensia mayuh, mayuh projek udah dikemendar di di Sarawak tang dikinsil.
“Kitai benasip laban Perintah Sarawak ngembuan bisi belanja kediri lalu Kepala Menteri chukup gerah jari,” ku iya.
Iya madah munyi nya maya mantaika jurai Mosyen Meri Basa Jaku TYT Sarawak ba Dun kemari.
Tandu iya, Kepala Menteri empu madah nyema Perintah Besai dipegai PH enggai mantu sereta bejalaika projek ke udah dilanggur, GPS deka ngambi projek nya ngambika dikemujur.
Iya mega madah rayat Sarawak deka terus meri sukung penuh ngagai Kepala Menteri enggau GPS dalam ngemansangka Sarawak.
“Bepelasarka pekara tu, endang beguna amat Sarawak terus negi hak ngulihka penatai pemisi ke bisi ba nengeri tu.
“Perintah PH enggau pengari sida patut ngamatka manifesto pengawa bepilih besai, entara nya besemaya meri 20 peratus royalti minyak enggau mulaika baru 50 peratus chukai diulih ari Sarawak,” ku iya.
PH ku iya mujur menang ba pengawa bepilih besai bepelasarka semaya ‘manis baka gula’.
“Diatu rayat nagih sida meri utai ke udah disemaya nya,” ku iya.
