Belanja ngepun sekula lempung agi

SARIKEI: Pekara pelajar deka seruran dikemerat ti nyadi sebagi ari chara Perintah Sarawak nentuka rebak biak ngasaika pengidup menyana dudi hari.

Adun Pakan, Tan Sri William Mawan Ikom madah, seriris enggau juluk nya perintah bejalaika bemacham chara nyengkaum nyendiaka bantu sekula ngagai nembiak.

Ku iya, pemeri uniform sekula nadai bebayar ngagai bala nembiak ti patut nerima bantu nya ngayanka penyiru perintah ngelempungka tating belanja apai indai nyendiaka kereban sekula anak sida.

“Aku pechaya, bantu tu mai reti besai ngagai sida kelebih agi gaya ekonomi enda meruan diatu lalu rega barang majak mar.

“Perintah meretika penanggul ditapi apai indai maya ngepunka sekula ba taun baru.

“Kitai mega sedarka pengelantang enggau peminta pelajar tu pekara ti nyamin pemujur pengawa nempa rebak ti nyulut jemah,” ku iya.

Iya mansutka jaku nya lebuh ngulu enggau dipebasa nyuaka bantu uniform Yayasan Sarawak ditu, tadi.

Suara Sarawak