KUCHING: Bemacham pekara ke meri pemaik begulai entara Sarawak enggau Singapore udah dikerandau lebuh Premier Sarawak betemu enggau Menteri Kedua Pekara Dagang enggau Industri Singapore, Tan See Leng.
Ba randau pengelama 45 minit nya, Datuk Patinggi Tan Sri Abang Johari Tun Openg enggau See Leng udah berandauka kerejasama mungkur kuasa ulih dikena baru, ekonomi gadung enggau hidrogen.
Dulu ari nya, Abang Johari mega bisi bejaku ba Singapore bekaul isu dagang dunya enggau serantau sereta bemacham inisiatif baru Perintah Sarawak.
Menteri Pengeluar Kuasa enggau Ngintu Rampa Menua nya udah dikangau nyadi pengelicha ba Randau Endowmen S. Rajaratnam 2022 (SRED 2022) diatur Yayasan Temasek.
Sama bisi datai nyempulang Abang Johari iya nya Menteri Utiliti enggau Telekomunikasyen, Datuk Julaihi Narawi, Direktor Unit Perambu Ekonomi (EPU), Datuk Dr Muhammad Abdullah Zaidel enggau Tuai Pegawai Eksekutif Sarawak Energy Bhd Datuk Sharbini Suhaili.
Di baruh pegai Abang Johari ke mega Tuai Perintah GPS, inisiatif berani tu dipejalai dikena ngubah enggau ngangkatka ekonomi Sarawak mungkur ekonomi digital, ekonomi hidrogen enggau ekonomi gadung.
Pia mega, inisiatif ngagihka belanja nengah Bank Pemansang Sarawak (DBOS) lalu Transit Pantas Autonomi (program ART) dikena nyendiaka perengka pengangkut mensia mayuh ti moden, Palan Sains Sarawak enggau betanam betupi komersial ti dikemansang ngena teknologi nentuka Sarawak nyadi palan eksport produk pemakai beresi.
Ba program nya, Premier Sarawak mega udah dirandau pemberita Straits Times.
Bemacham tanya dibantai nyengkaum pasal pemansang ekonomi di Sarawak, otonomi enggau hak bepelasarka Konstitusyen Perintah Besai enggau Sempekat Malaysia 1963 (MA63).
