Bemacham inisiatif, program PH ngasika rayat

Lebih 200 pedagang betanam betupi, berikan teulihka pemaik

KUALA LUMPUR: Sepenyampau 2,769 ngaul diri ba pengawa betanam betupi enggau berikan nerima pemaik ari bemacham inisiatif enggau program dipejalai di baruh Opis Menteri Bumai enggau Industri Betanam Betupi dalam timpuh nyauka setaun Perintah Pakatan Harapan (PH) megai pengawa menua.

Menteri iya Datuk Salahuddin Ayub madah entara inisiatif pemadu mujur iya nya Program Agro Nisaa’- I, ti nyendiaka bantu belanja mikro kelebih agi ungkup pedagang indu ti datai ari raban bepenatai pemisi baruh (B40).

Nengah program nya ku iya udah meri pemaik ngagai 1,719 penyereta enggau penyampau RM 5.3 juta dipelanja kenyau ari dilanchar November taun nyin tadi.

Nitih ku iya, program kerejasama enggau Agrobank nya mega mansutka asil jampat amat pengudah mujur mansutka penatai pemisia ngagai bala penerima agih belanja nya.

Datuk Salahuddin Ayub

“Aku mega bisi berandau enggau siku indai tunggal ti nerima bantu belanja tu lalu kitai meda iya mujur amat teulihka penatai pemisi RM200 ngagai RM300 sehari ari bejualka produk iya ba bangsal Kaunsil Makit Betanam Betupi Perintah Besai,” ku iya rambau aum pengarang berita khas beserimbai enggau setaun PH merintah menua, ditu tadi.

Kelimpah ari nya ku Salahuddin, di baruh program Agropreneur Biak magih belanja penyampau RM6.2 juta disedia ungkup 403 pedagang agro biak beumur entara 18 ngagai 40 taun.

“Genap pedagang biak tu nerima bantu entara RM10,000 enggau RM20,000 dikena mansutka ekonomi enggau nambahka penatai pemisi sida ba pengawa dikaul,” ku iya.

Berebak enggau nya, Salahuddin madahka Program Pasar Nelayan ti meminimumkan rentayan makit enggau ngelepaska raban berikan ari perekuh orang tengah mega udah ngemai pemaik ngagai 532 raban berikan enggau penyampau rega dagang manggai RM47.7 juta.

“Kelimpah ari nya, 113 pedagang enggau 25 Gerempung Orang Bumai Pelilih Endur nerima pemaik asil model dagang industri nupi manuk ti genap ba sepanjai rentayan rega,” ku iya lebuh ngerinta sekeda pemujur dijapai opis menteri nya kandang setaun tu.

MP Pulai nya mega bisi mantaika pemujur dijapai sida senentang nyendiaka jalai makit rian sejuk beku dalam bentuk biji ke China kena 20 Ogos taun nyin tadi ke alai 67 pekebun rian direjista di baruh Opis Betanam Betupi ungkup eksport produk nya.

Suara Sarawak