Bemacham pengelandik tebantai nyerumba PKP

Sekumbang kemisi panjai nyerumba Atur Tagang Pejalai (PKP) diperati ba media rama bemacham pengelandik dibantai mensia mayuh ba serata menua tu.

Semua tu digaga digaga ketegal pengelepa, enda nyamai diau jenuh laban ti teleba kiruh sereta rindu nguji sesebengkah pekara ke baru.

Bisi sekeda nya mandangka asil pengawa ti enda kala digaga diri nyerumba PKP pengudah dichakap bala kaban sereta rindu ngisi awak diau enggau pekara ti meri pemaik.

Entara pengelandik ke chukup mayuh dibantai di media rama sekumbang PKP tu iya nya pekit ngaga penyaram.

Penyaram sebedau tu semina mayuh dipeda rambau pengerami Gawai Dayak enggau pengerami bukai tang ketegal awak kemisi PKP pengawa ngaga penyaram nyadi siti daya pengidup ke mayuh dikerembai ba media rama.

Entara perengka patut disedia dikena ngaga penyaram iya nya tepung gandum, tepung padi amai, tepung pulut, gulai apong belai, gula melaka, gula pasir enggau ai.

Pengelandik mensia mayuh ngaga penyaram ukai semina tebantai ba media rama tang mega bisi ayan ba berita tv astro, dia dipandang pekit ngaga penyaram ukai semina digaga peranak Sarawak tang mega diuji peranak nengeri bukai baka di Semenanjung enggau Sabah.

Di Semenanjung sida nyebut penyaram tu Chuchur Jawa lalu ngembuan resia kediri empu dibanding enggau chara ngaga di Sarawak.

Kitai bela nemu kuih penyaram tauka penganan iri endang udah lama dikelala ba raban bansa Dayak di Sarawak tang taja pia dalam ngasilka pendiau penyaram ti manah tentu bisi resia iya empu.

Bemacham gamal penyaram bisi dibantai ba media rama, diselup enggau bemacham chura, bisi nya nyengala manah lalu enda kurang mega ti kurang nyadi disemaka kedua baka pendiau Covid-19 seraya dikena sida bebuti enggau pangan diri.

Semua asil penyaram dibantai bepanggai ba pengelandik sesiku orang ti ngelumai tepung, bisi nya ngerembai manah lalu bisi mega baka bulan (segala tauka nadai bungai ditisi) tauka baka buah bol.

Kelimpah ari ngaga penyaram, mensia mayuh mega bisi mantaika pengelandik ngaga pemakai bukai baka kuih, kek enggau roti baka roti puri, roti jala, karipap, chakui, penganan semut, jupan, kek lapis enggau mayuh agi ke bukai.

Pia mega nyerumba PKP mensia mayuh lebih agi raban orang lelaki sekumbang PKP tu nyau landik beguntin buk diri empu laban ti nadai kedai guntin dibuka.

Diatu mega nitihka singkang pemansang dunya teknologi mensia mayuh bela ulih mandangka pengelandik video diri betanda bemacham gaya, kelimpah ti belagu.

Raban nembiak sekula mega chukup sinu laban ti semina bepekul ba bilik dia sida mayuh mandangka pengelandik diri nero bemacham utai nitihka pinta bala pengajar enggau apai indai sida.

Ungkup nembiak renggat pelajar tinggi sida meruan belajar tauka bisi kelas baka selama tang ngena chara digital iya nya ari video online.

Pengelandik bukai ke bisi diayan mega baka beranyam, nenun, ngajat, ngeripir perengka elektronik ke udah rosak, ngaga senapang ikan, besenam kediri di rumah enggau nadai nguna sebarang perengka baka dalam gym.

Semua tu nadai pulaika penanggul asal aja bisi pengeransing ati. Semua utai ulih digaga magang ke pemaik tubuh diri empu enggau pengerai.

Taja pia arapka semua kitai terus jenuh diau di rumah seagi PKP diteritka perintah awakka rantai penyakit Covid-19 tu jampat agi putus tauka punas.

Ungkup rikod, bepelasarka penerang ari MySejahtera diatu masuk minggu Ke-17 penyakit Covid-19 udah nuntung menua Malaysia. Penyampau kes baru minggu tu aja naka 23 April tu tadi dirikod bisi 214 kes lalu penyampau kes ke udah gerai 345 iku.

Udah nya penyampau kes ke diripot agi aktif tauka idup iya nya naka kemari mega bisi 1966 kes. Ari penyampau nya, 1924 kes benung diperubat ba ward pesakit luar lalu 42 kes diperubat ba ward sakit raya (ICU).

Naka kemari mega, penyampau semua kes positif kenyau ari keterubah Covid-19 diripot bisi 5,603 kes. Ari penyampau nya 3,542 kes mujur gerai lalu 95 kes diripotka mati.