SERIAN: Gempung Parti Sarawak (GPS) patut terus merintah nengeri pengudah Pengawa Bepilih Nengeri (PRN) Sarawak Ke-12 ila dike nentuka nengeri tu terus mansang.

Sapit Kepala Menteri, Datuk Amar Douglas Uggah Embas madah, Sarawak udah nyapai mayuh pemansang kenyau ari taun 2017 sekumbang diiring Kepala Menteri Datuk Patinggi Abang Johari Tun Openg.

“Juluk Abang Johari iya nya deka meda Sarawak nyapai status nyadi sebuah nengeri mansang ba taun 2030.

“Enti juluk nya mujur dijapai, pengawa nya mai empas ti besai ngagai selampur Sarawak,” ku iya,

Uggah madah munyi nya lebuh bejadika ‘Program Japai Komuniti Betanam Betupi (AgriCOP)‘ Dun 22 Kedup di Balai Babuk Barum, Kampung Bunan Gega tauka Bunan Punok, Serian, ensanus.

Nangkan nya iya madah, Abang Johari iya nya Kepala Menteri ungkup semua laban udah mayuh ngelancharka program pemansang ungkup semua raban bansa nyengkaum nyukung penumbuh Unit Pekara Jalai Pengarap Bukai (Unifor) ti nyaga pengelantang organisasyen ukai pengarap Islam.

Nya alai, kitai deka Abang Johari enggau GPS terus merintah nengeri Sarawak pengudah PRN tu ila, ku iya.

Uggah mega madah perintah GPS udah mandangka penegap, polisi enggau mantaika program pemansang ungkup Nengeri Sarawak.

“Tu ukai semina jaku puang, tang GPS udah mai pemansang ngagai selampur Sarawak,” ku iya nyemetak.

Berebak enggau nya, Uggah mega berasai ensiban ati ngagai piak ti udah naburka janji ti deka ngurangka rega petrol enggau meri royalti minyak 20 peratus ngagai Sarawak, tang bedau dikeamatka sida.

“Nyadi, aku ngelalau rayat Dun Kedup deka terus meri sukung ngagai pengari rayat kita (Martin Ben) maya PRN ila,” ku tandu iya,

Ku iya, Martin semampai ngemeratka pemansang ba sitak iya awakka enda tinggal ari semua sukut pemansang infrastruktur.

“Nya alai, aku andal kita terus meri sukung ngagai GPS sereta ngenanka Abang Johari terus nyadi Kepala Menteri Sarawak awakka nengeri tu nyadi sebuah nengeri ti mansang ba taun 2030,” ku lalau iya.