SIMANGGANG: Urung 2,500 komuniti ngelingi enggau luar Sri Aman ngambi bagi ba Benak Road Trail Run ulih nyadi duta dikena mantaika Pengerami Benak ngagai tikas ti tinggi agi.
Sapit Menteri Pelajar, Inovasyen enggau Pemansang Penau, Datuk Francis Harden Hollis madah, penyampau penyereta ti nambah belipat ari 1,250 iku ba taun nyin kemari ngagai 2,500 iku ba taun tu nyadi bukti rayat Malaysia majak mayuh ngaul gaya idup bepengerai.
“Benak Road Trail Run sebengkah program belanda neresa babas pemadu besai ba Bagi Menua Sri Aman ti ngempung dagang temuai lumba, pemansang meruan enggau tanggungpengawa ngagai rampa menua.
“Pia mega, program tu bela diaku nyadi pelasar dikena ngelakuka Pengerami Benak ngagai tikas ti tinggi agi ngagai bala penyereta sebarang maya,” ku ADUN Simanggang nya empai lama.
Program belanda nya, ku iya, nyadi sebengkah program dikena ngangatka isi sebedau ngatur Pengerami Benak kena 29 September nyentuk 1 Oktober tu.
Harden madahka diri temegah ati meda timbal manah ari komuniti dia.
“Lebuh meda timbal manah tu, aku deka terus nanggam kerejasama enggau Kaunsil Dagang Temuai Sarawak (STB) dikena ngelakuka Benak Road Trail Run ba Sri Aman ditu taun baru.
“Aku pechaya, program tu deka meri peluang ngagai bala penyereta ngaul pesaka rampa menua, main asal enggau pemansang Mengeri Simanggang.
“Kebuah pia laban jalai trek ungkup program tu chukup nyelai sereta mandangka pemanah rampa menua baka utai tumbuh enggau jelu siga kelimpah bepeluang meda pemansang pemadu baru ba Sri Aman sepanjai program tu diatur,” ku iya.
