Bengkel Kain Buriek, Sugu Tinggi terebai ke Semenanjung

KUCHING: Serakup Anak Borneo Semenanjung deka ngatur Bengkel Ngaga Kain Buriek enggau Sugu Tinggi Keterubah di Kuala Lumpur kena 9 November tu.

Louis Kelaman ke dikangau nyadi pengajar maya bengkel tu ila madahka tu datai ari peminta mensia mayuh ti deka belajar ngaga pekayan asal raban bansa Iban.

Ku Louis, pengawa serak tu mega berindik ari pemujur bengkel ke sama diatur ba menua Johor enggau Selangor kelimpah ari menua Brunei enggau Sarawak ditu empu sepanjai taun tu tadi.

“Nyau nadai ngelaungka hari sema jaku endur aku nangkup kangau ari mensia mayuh baikka nya di kandang mengeri besai tauka di menua pesisir.

“Bengkel ngaga sugu tinggi enggau nyait kain buriek tu chukup mayuh peminta, ukai semina peranak menua tu empu tang mega ari menua luar baka Brunei Darusalam.

“Sida mega nadai betawar rega enti meli asil produk pengelandik jari ditengkebang aku laban ngira kualiti enggau pengalus,” ku Louis lebuh dirandau Suara Sarawak.

Ngelansa pasal bengkel nya, Louis madahka diri temegah ati udah dikangau nyadi pengajar laban ba penemu iya.

Ku iya, tu basa chukup besai sereta kelai sida ngenang pemanah asil jari ditengkebang iya ngelama tu.

“Ari pengandal dilempai ba bau aku kelaika sida pechayaka aku ulih ngembing, ngiring enggau ngajar sida ari penemu ti deka dikunsi ngagai bala penyereta.

Louis ti mega siku aktivis budaya enggau pematih tebilang diterebai khas ari Sarawak endang berasai gagit deka betemu seraya beduaka sekeda penemu diri.

Nitih ku penerang, bengkel deka diatur ba Putra Intelek International college, Seksyen19 di Petaling Jaya Selangor berengkah ari pukul 9.40 pagi nyentuk 5 lemai.

Nambahka nya, pemakai enggau ai irup bisi disedia piak kolej empu lalu bayar penyereta penyampau RM180 siku ke alai kereban dikena ba bengkel udah disedia sereta asil pengelandik jari deka diempu sida pengudah tembu bengkel.

Penerang silik tau betanya ngagai piak pengatur ba lumur 0105238895 (Ling), 0108667244 (Serit Banyan), 01160683270 (Andrew Andyrias) sereta Louis empu 0192344562.

Barang sapa bisi ati nyadi kaban whatsapp mega tau ngelawa website https://chat.whatsapp.com/Gq0MnBygkNUCProIoBszDf

Suara Sarawak