Bengkel Penempa Sugu Tinggi di Melanjan Spak nyapai juluk

BETONG: Diau jauh di ulu sungai enda nekul pengeran peranak Padeh ditu begagaka rengka ngepan Iban.

Pengeran sida nya mega meri peransang ngagai Louis Kelaman, siku pedagang asil pengelandik jari ti chukup tebilang nama di menua tu.

“Pejalai kami sebuat kin mega umbas iya pemar laban menua bebukit sereta renjan amat ditengah.

“Ditambah enggau musim pengujan diatu ngasuh jalai mar amat ditengah, nyau asai digenggam semengat.

“Taja enda jauh, ke alai kami ari jalai besai napatka simpang Layar lalu tama ngagai simpang Linsom tang ketegal jalai kelalu renjan, berasai amat asai sepi aku,” ku iya ngelansa pejalai sida.

NGEMBING… Louis nerang chara nempa sugu tinggi ba mua penyereta.

Louis mega nadai ngadang nerima timbal manah amat ari peranak menua nya ti gagit sereta ransing begagaka rengka ngepan asal kitai bansa.

“Tebal agi penyereta sekali tu datai ari bala pengajar enggau ketuai raban bansa lalu enda ngelaungka indai tunggal sereta sida ke datai ari ruang bilik seranta.

“Kebuah pia laban endang sida tu nyadi raban diselinting bengkel diatur aku ngelama tu,” ku Louis ti rejista enggau Kaunsil Pemansang Kraf Jari Malaysia Pampang nerang.

Iya mansutka jaku tu lebuh dirandau Suara Sarawak beserimbai enggau Bengkel Penempa Sugu Tinggi diatur begulai The Iban Women Charitable Trust (IWCT) enggau Palan Servis Dun Layar.

Bengkel mujur diatur ba Rumah Rokayah, Melanjan Spak di Padeh Betong kena 24 Ogos tu tadi, berengkah ari pukul 12 tengahari nyentuk 4 lemai.

NYINUK… Bala penyereta bengkel mending penerang ari Louis.

Ku Louis, bengkel sekali tu dipelanja Tan Sri Empiang Jabu enggau Kaban Kunsil Nengeri (Adun) Layar Gerald Rentap Jabu lalu nerima 30 penyereta.

“Ngasuh ati balat temegah meda semua sida mujur nembuka sugu tinggi laban jampat nangkap utai diajar.

“Nadai entu beleman ngajar sida laban ngasika jaku ajar taja umur kami jauh bebida. Semua pemujur tu datai ari basa enggau penyiru kitai begulai,” ku iya madah nyemetak.

Tambah mega ku iya, kereban dikena ngaga sugu tinggi endang udah disedia magang.

Tebal agi bala penyereta datai ari Melanjan di Spak enggau ari Jelang Spak, Kerapa Spak, Nanga Majau Spak, Tapeh Spak, Temedak Spak, Kabok Spak, Luing Spak, Lubau Baru, Nyelutong, Engkalat, Ijok, Grugu sereta Penyuin, ku Louis ngerintai penatai menua sida.

TEMEGAH… Siku ari penyereta berasai gagit amat ngerasuk sugu tinggi ditempa iya empu ba pala.

“Penatai enggau sukung ari bala ketuai raban bansa mega chukup ngemegahka aku laban tu ngayanka sida nyadi ketuai chunto ti ransing ngetanka rengka ngepan kitai baka sugu tinggi tu.

“Tu mega nipakka tuju enggau juluk pejalai kami ti keran ngetanka pesaka asal ti nyadi kelai enggau pengaya kitai bansa Iban ti tampak rita ngembuan pengeraja.

“Sukung ari Kaunsilor Tabari tauka Saluma Megong tau diteladan bala bukai kelebih agi bala ketuai ambika bisi dichunto enggau nyadika peransang sida,” tandu iya.

Nambahka nya ku Louis, penau enggau pengelandik nempa asil jari baka sugu tinggi tu ulih mantu nambah belanja ruang bilik sereta nyungkak ekonomi sida enti dikemeran sereta dikemerat.

“Tu mega sebengkah ari chara kami sebuat mantu bala penyereta ngiga belanja tambah tauka nyadi batang pengawa sida ke diau di rumah panjai ngaul diri begagaka produk tu.

KENANG MANIS… Louis (duduk tengah) begambar bebala mayuh pengudah Bengkel Penempa Sugu Tinggi Iban di Rumah Rokayah, Melanjan Spak ditu tembu.

“Kitai meri peransang ngagai sida, ngiri enggau meri sanding penemu pasal dagang asil pengelandik jari diatu jauh udah maju sereta bisi makit kediri empu.

“Nya alai kitai naka ulih ngembing sida ngambi ulih nangkup peminta makit enggau dagang tu nengah bengkel enggau program ti seruran diatur ungkup sida,” ku iya nerang silik.

Ku Louis, kitai bechunto pengawa dikemeran bala menyadi di menua Kalimantan ke alai sida mengkang ngetanka penulin rengka ngepan Iban nyengkaum sugu tinggi.

“Ba penemu aku, kitai endang patut bekunsika penemu enggau bala bukai laban pengawa tu enda ngasuh penemu kitai kurang tang majak nambah, tegap agi.

“Taja diatu kitai jarang meda sugu tinggi digaga ari temaga tauka pirak, tang kitai naka ulih ngetanka gamal rengka tu, digaga ari aluminium disepuh pirak.

“Aku kala nempa sugu tinggi ari temaga tulin enggau pirak. Taja mayuh kelikuh sereta mar ditempa, tang asil ngasuh ati tepantup.

“Ambika chunto, lebuh ngatur bengkel buriek enggau sugu tinggi di menua Brunei apin lama ke udah, sida din enda kakang ati meli sugu tinggi temaga aku enggau rega RM3,500.

“Ni enda ati ransing agi ngereja pengawa tu lalu aku dekaka tu nyadi peransang ngagai bala bukai,” ku iya.

Nambahka nya ku Louis, mayuh macham bansa rengka ngepan indu Iban ti tau diangkat nyadi dagang kelimpah ari sugu tinggi nyengkaum tangu tauka marik empang, selampai enggau ke bukai.

“Genap rengka ngepan kitai endang uluh diangkat nyadi dagang pengelandik jari sereta bisi peminta tinggi enti dikereja enggau bebendar.

“Aku lantang amat meda majak mayuh kitai bansa ngaul diri ba dagang pengelandik jari baka tu laban ba penemu aku, makin mayuh orang enggau kitai besemekih, makin ransing ati kitai nempa utai manah agi ari enggi orang.

“Tu mega meri peluang ngagai bala pedagang mekit pangan diri ngena chara ti betul sereta ngemansangka diri seraya nyungkak ekonomi sida,” terang iya.

Penyelai bungai enggau buah dikena kitai ngela rengka ngepan mega nyadi pematak besai sereta pengelebih bansa kitai nyulut ba dagang pengelandik jari tu.

Nya alai ku Louis, kena manah peluang, penyelai enggau pengelebih tu dikena ngangkatka nama diri pegari baka orang bukai ti udah dulu nyulut dalam dagang tu.

“Bemacham rengka pirak enggau manik disangking enggau digaga nyadika ngepan indu Iban lalu tu mega nunjukka pangkat enggau pemisi tauka pengeraja orang ti bempu bilik.

“Chunto iya, sugu tinggi dirasuk ba gumpal buk ti disanggul meri ‘seri’ ba mua indu ngena iya sereta manding dipeda kelebih agi maya mantaika ajat.

“Rengka ngepan ti chukup mega ngayanka kelai pengaya kitai ba pesaka enggau keresa lama kelimpah nyadi basa ngelalu penatai temuai ngagai bilik kitai.

“Pemanah langkar, buah enggau bungai ditempa mega mandangka kitai ngembuan penau nempa utai enggau pengalus keranjai jari lalu tu endang ditampung ari jeman aki ini menya,” tandu Louis.

Nya kebuah Louis keran amat meransang enggau nesau peranak menua tu nadai ngira dini alai bela angkunka pengawa ngetanka penulin keranjai jari kitai bansa asal kelebih agi nempa rengka ngepan.

Suara Sarawak