Bengkel Taxidermy: Ngintu pesaka kampung

KUCHING: Opis Muzium Sarawak deka ngatur Bengkel Taxidermy tauka bengkel pasal kereja meresi enggau ngerangkai kulit jelu pengelama dua hari berunggu berengkah ari 27 ngagai 28 Julai.

Nitihka penerang ari opis nya kemari, bengkel tu deka diatur ba Muzium Natural History di Jalai Tun Abang Haji Openg ditu beserimbai enggau ngintu Hari Muzium Entarabansa 2019.

Tuju sida ngatur bengkel tu iya nya deka meri peluang ngagai mensia mayuh nemu baka ni chara meresi enggau ngerangkaika kulit jelu.

Kelimpah ari nya, opis tu mega nagit ulih ngambi bagi Malaysia Book of Record ngatur Bengkel Taxidermy pemadu lama nadai ngetu kandang 24 jam.

Penerang nya mega bisi ngelansa reti pengawa taxidermy tu sebagi ari chara nyimpan kulit jelu ti udah parai ngena bahan kimia, material enggau chara ti betul nentuka kulit jelu nya dipeda nyata enggau baka agi idup.

Opis Muzium Sarawak udah nyendiaka mayuh bansa jelu babas, burung enggau ikan ti deka nyadi specimen tauka chunto lalu siti specimen tu disedia empat jam pengelama.

Bengkel tu beguna amat nentuka bala nembiak rebak baru nyengkaum nembiak sekula belajar pasal bansa jelu babas enggau utai idup bukai ti majak punas diatu.

Taxidermy tu datai ari leka jaku Greek ti ngemai reti ngintu kulit ngambika enda mudah retai enggau jai.

Tu sebagi ari seni ti ngiri penau ngelekat enggau ngintu kulit jelu ngambika semampai dipeda baka agi idup.

DITU… Bengkel Taxidermy deka diatur ba Muzium Natural History di Jalai Tun Abang Haji Openg, 27-28 Julai tu.

Suara Sarawak