Bepangka siruka pengawa bumai

RABAN bansa Iban ngembuan mayuh bansa main ari utai dikemisi ngelingi sida baka ari utai tumbuh enggau utai idup ari babas enggau ke bukai.

Enti suba, bala nembiak mit suah bemain sebelah tanah, ngereja mayuh macham utai baka betikika pun buah, main letup, ayun kayu lalu enda tinggal mega ngeruh ai ngelulu sida ke tuai bepangka.

Lebuhka bemain, nembiak lelaki enggau indu bela deka nyadaka leka lagu dikena nundi pangan diri.

Ba sida ke nembiak ke baru ngangkatka diri bujang dara, main tu semina dikena beperindang, ngempitka kaul bebakih enggau pangan diri sereta ngisi jam lebuh enda enggau turun kumai.

Bebida enggau sida ke tuai ti ngemeranka main laban bisi tuju enggau kebuah nali adat asal aki ini bepelasarka daya idup dikemeran enggau ditampung.

BEGASING… Pangka ari raban nan enggau mangka benung begasing ba kelang

Tebal agi rebak diatu semina nemu nama main enggau bemain aja tang nadai seling penemu pasal reti enggau tuju sesebengkah main nya dimain.

Ambika chunto, sida ke tuai suah main pangka laban bisi tuju nitihka adat tang sida ke nembiak bemain pangka ketegal ati rindu.

Bepangka

Bepangka tu sebengkah ari main asal Iban ti dikerindu semua renggat umur dikena ngerindang hari kelimpah bisi tuju bukai ti besai reti ngagai pengawa bumai betaun kelebih agi bumai bukit.

Serak tu Suara Sarawak mai kitai bekenang pasal main bepangka nitihka tuju enggau renggat umur sida ke bepangka laban bisi reti enggau tuju ti bebida.

Nya alai kitai deka beratika tuju enggau main bepangka tu mai reti bebida nitihka renggat umur sida ke bemain laban bepangka tu bisi lebas ke bendar, bisi atur enggau bisi penti.

Dulu menya, main bepangka tu suah dimain ari bulan June ngagai Ogos ke alai sida ke lelaki kiruh gawa nebang, nasau, ngebak enggau nebas tegalan endur bumai baru.

Sekali agi maya ujung bulan Februari ti dimain sida ke nembiak lelaki lebuh padi ngandung ngambika buah padi jampat perisi enggau tuai lalu tu mega nandaka berekat ari Petara.

NYINUK… Bala nembiak ngasingka pangka sida

Tuju Bepangka

Bebida sida ke tuai, main asal tu dimain bansa Iban maya nebas enggau maya padi ngandung laban bisi tuju enggau reti ke berat, nampung pengawa aki ini menya.

Ari nya, iya dimain maya nebas laban dikena ngayuka babas ti udah ditebas mudah rebah, lengis lalu nadai ngachau urat enggau pun padi.

Enti maya padi ngandung main bepangka tu ngayuka Iban mangka kandung padi lalu ngasuh buah iya jampat pansut enggau perisi sereta tumbuh galak.

Kebuah pia laban pengidup kitai bansa menya endang bepanggai ba asil padi diulih ari pengawa bumai betaun lalu kitai chukup bebasaka indu padi ti nentuka rejeki kitai taun nya.

Padi tu disema kitai baka pun pengidup ke alai sida ke bumai chukup beratka semua rurun pengawa bumai ti enda tau enda dititih nangika bisi penimpang, irauka pemali dilanggar lalu tau ngujungka padi enda nyadi.

Kereban Ngaga Pangka

Bansa pangka ti suah digaga iya nya pangka layak, pangka kulat muyung, pangka gunjau enggau pangka labu nitihka penau orang ti nengkebang iya.

Genap penama pangka tu endang bisi reti enggau tuju iya lalu dimain nitihka pemintar runding sereta penyikar siku-siku.

Nampung penemu sida ke tuai, pangka suah agi digaga ari kayu kering, liat sereta berat baka kayu tebelian, menggeris, kempas, bait, sanjan enggau tapang awakka tan dikena bepangka.

Kebuah pia laban buah pangka ti tan ngayuka pengawa mujur, nadai utai nanggul sereta nekul nitihka penemu orang tuai.

Tambah mega, tali pangka digaga ari ribis tekalung tauka pingan ti udah dianyam memanah ngambika tan, enda mudah putus ngapa sereta nyamai dikena lebuhka bemain.

Semua kereban dikena ngaga pangka tu diambi ari kampung ngaul pengawa betebangka kayu, ngelumpung, nyayat, mansap, ngalus ngena tempelas dataika buah pangka tembu.

Penyinuk enggau pengelama pangka ke bepusin ditentuka pemintar orang ke mangka.

PERISI… Bepangka ngayuka Iban mangka kandung padi lalu ngasuh buah iya jampat pansut enggau perisi sereta tumbuh galak.

Chara Bepangka

Lebuh bemain, orang ke bepangka dibagi ngagai dua raban iya nya seraban nan lalu seraban agi mangka ke alai penyampau tubuh sida ke bemain nadai ditatak.

Iya ke nan, ngasingka pangka ba menalan nan lalu tembu semua orang ke nan nya ngasingka pangka sida, nya baru orang ke mangka lalu mangka ari adan mangka tauka garis ti udah ditetap.

Penyauh adan mangka ti keterubah iya ari menalan kira dua depa setengah ngagai tiga depa sida ke besai tuai. Penyauh takah tu enda tau enda disebela enggau dikelai ngambi enda berakalka pangan diri lebuh bemain.

Enti pangka orang ke mangka kena lalu naga iya lalu disiduk. Udah nya iya dibai ngagai palan ke endur besemetah seraya pangka agi nyinuk bepusin.

Adan ke alai mangka dibagi ngagai mayuh takah lalu patut sereta enda tau enda ditapat sida ke bemain laban tu nentuka pangka sida menang tauka enda.

Adan ti pengabis semak ari adan nan dikumbai adan jinak. Udah nya lalu ditangkanka enggau adan siga, adan janau, adan ringka enggau ti bukai.

Ba siti adan sida bemalam tiga malam lalu enti menang nya baru tau singgah ngagai adan bukai.

Lebuh maya besemetah, semua pangka ke agi begasing dibai pulai ngagai endur besemetah.

Dia pangka nya lalu ditejuka begasing ba rumah padi tauka daun lalang. Pangka ke dudi padam nya ke menang.

Intu Manah Main Asal

Nya tadi penerang senentang chara-chara raban bansa Iban bemain pangka sereta enggau tuju sida bepangka ti dikereja nitihka atur bemain ti udah ditetap.

Taja pan bepangka udah jarang dikemeran raban bansa Iban kemaya hari tang ngagai sida rebak baru main tu agi tau dipelajar.

Nya alai, barang sapa ke bisi penemu enggau penau tau endur betanya lalu nyadika malin kitai ngangkatka main asal tu.

Nambahka nya, taja nadai ngereja pengawa bumai betaun agi tang kitai patut bisi penyiru ngagai adat enggau main asal tu baka kitai siruka main asal bukai baka ajat, gendang pampat, tabuh enggau ke bukai.

Main tu mega ulih dikemansangka nengah pengawa ngintu, Pansik enggau Pemansang (R&D) sereta ngena chara bukai ngambika enda retai laban panas enggau ujan, enda punas dibai segang pemansang dunya.

Jaga manah pesaka asal ditinggal aki ini kitai ngambika bisi dipeda dudi lalu sida ngelala nama main ke dikumbai orang bepangka.