Bepasa taun tu berasai nyelai

KABONG: Kaban Kaunsil Nengeri (Adun) Kabong Mohd Chee Kadir minta ampun nuju peranak sitak Kabong ketegal enda ulih sama pasa begulai enggau sida ketegal PKP ti dipejalaika kenyau ari 18 Mac tu tadi.

Iya madah, balat agi berasai nyima laban ngasai kediri enda ulih limpang lalu begulai enggau peranak Kabong ti bepengarap Islam bepasa ba bulan ramadan diatu.

“Pasa ke taun tu bisi bendar berasai nyelai ari taun ke udah laban kitai enda ulih sembiang enggau makai begelumu maya lemai hari (buka pasa) baka ngelama tu.

“Pekara baka tu mega diasai semua orang ti bepengarap Islam selampur dunya ketegal pengerekai covid-19 enggau PKP.

“Nya alai, aku ngarap semua peranak Kabong tetap seati lalu bela sama nyaga pengerai tubuh diri enggau diri sebilik dikena kita sama betulung ngemutuska rantaian igi penyakit tu,”ku iya.

Chee Kadir madah munyi nya ba sebengkah penerang iya nuju pemberita nengah media rama lemai kemari.

“Taja pelilih Kabong mengkang ba zon gadung tang nya ukai reti kitai tau tebelengga lalu enda nitih ke atur PKP ti dipejalaika perintah jam diatu.

“Enggau tu mega aku nangkan semua peranak Kabong bepengarap Islam sama besabar ngereja pasa sida nyerumba atur PKP ti mega ngujungka bazar ramadan enda dibuka ke taun tu,”ku iya.

Nambah nya ku iya, naka ke sehari tu peranak Kabong udah meri kerejasama ti manah ngagai piak bekuasa dikena ngemunaska penyakit Covid 19 sepemanjai PKP tu.

“Arapka peranak Kabong ulih ngetan status zon gadung,”ku iya.