Berani berubah nipakka peminta servis

KUCHING: Genap pemesai enggau raban Opis Bomba enggau Penyah Penusah Malaysia (JBPM) patut berubah nitihka singkang pemansang dunya ngambika ulih meri servis bukai manah agi.

Direktor JBPM Nengeri Sarawak PKPjB Khirudin Drahman @ Hussaini madahka dalam bejalaika pengawa sida, genap iku pemesai enggau raban JBPM meseti berunding luar ari tikas pengawa sida taja udah bisi atur, Standard Atur Operasyen (SOP) enggau tagit pengawa bomba udah diterang.

“Di Sarawak, genap iku ketuai zon enggau opis enda tau enda bisi pengangkun lebuh bejalaika pengawa sereta nempa kaul begulai enggau komuniti.

“Bepelasarka kes angus ke udah kala nyadi, lebuh bisi kaul enggau komuniti, kami beratika sida ke diau ba genturung nya deka nyadi orang keterubah bepadah enggau minta sah ba penusah angus nyadi,” ku iya.

Khirudin madah munyi nya ba aum pemberita pengudah Pengawa Bebaris Ninting Taun JBPM Sarawak di Dewan Serbaguna Indu Opis JBPM Sarawak ditu tadi.

Ukai nya nya, piak Opis Menteri Pengawa Berumah enggau Kaunsil Kandang Menua enggau JBPM deka numbuhka balai ti ulih meri bantu ngagai endur di menua pesisir Sarawak.

“Di Sarawak, timpuh meri timbal ngagai menua pesisir iya nya pengelama tiga ngagai empat jam dibanding enggau menua mengeri tauka menua semak nengeri semina 10 ngagai 30 minit aja.

Nangkan nya ku iya, taun 2019 bisi empat kes angus udah mujur diputar kelebih agi komuniti udah diajar sereta dilatih bekenaka kereban madamka api enggau betul.

Suara Sarawak