KUCHING: Kenyau udah ditayang kena 10 Oktober taun siti nyin kemari nyentuk ujung bulan June, TVS udah nerima 7.1 juta iku ti meda.
Tuai Pemesai Eksekutif (CEO) TVS Suhaimi Sulaiman madahka penyampau orang ti meda stesen televisyen nya endang amai mayuh.
“Penyampau rayat nguan menua Sarawak semina dua juta lebih aja, ari ni penatai lima juta ke bukai enti enda ari Semenanjung.
“Aku nerima timbal ari sida di Semenanjung ti madahka sida enda nemu jaku kitai ditu, baka program Rezeki Air, tang sida rinduka program nya,” ku iya.
Suhaimi bejaku munyi nya lebuh dirandau Suara Sarawak ba opis iya di Cityone ditu, kemari.
Ku iya, ungkup timpuh pandak penyampau 7.1 juta orang ti meda nya siti pekara ti patut dikemegah.
“Lebuh aku nyadi siku pemacha berita suba, sida madah ke aku mesti ngena pekayan ti muntang ngambika enda diruga lebuh bejaku.
“Tang diatu, aku meda pekara nya udah enda sebaka agi, laban lebuh Hari Raya tu tadi, kami ngasuh pemacha berita ngena produk seni baka Keringkam.
“Tu entara asil seni ti balat dikerindu orang nyentukka sida nanya dini meli,” ku iya.
Bekau ari nya iya nusi, rambau Hari Gawai tu tadi sida ngasuh raban pemacha berita ngena ngepan Iban, baju bansa Bidayuh enggau ke bukai.
“Pekara tu dikunsika aku ba media rama iya nya twiter, ari nya orang berengkah bekunsi nyentukka penyampau orang ti meda TVS majak mayuh.
“Pekara tu enda sengaja udah ngelakuka dagang temuai enggau ngelakuka main asal kitai di Sarawak.
“Kitai endang sama baka stesen televisyen ke bukai diserata dunya tang bekau ari pupu bansa kitai ditu, kami ulih ngeluarka penyelai, nya ke ngasuh aku berasai gaga,” ku iya.
Kelimpah ari nya, ngelansa pasal program ti balat dikerindu mensia mayuh di menua tu, Suhaimi madahka rayat Sarawak rindu meda berita.
“Berita Utama 8, berita dalam jaku English enggau Berita Iban entara program ti ngembuan pemadu mayuh orang meda ninting hari.
“Engka ketegal sida rindu meda menua diri empu tama dalam berita.
“Kelimpah ari nya program Menarik 10 mega dikerindu orang ti meda laban program tu enda berat,” ku iya.
Nangkan nya, ku iya rayat Sarawak rindu meda program ti meri pemaik ngagai mensia mayuh (human interest) baka Rezeki Air.
“Bisi siti program ti udah diulang kami lebih ari 10 kali iya nya Rezeki Air, nyentukka sehari tu program nya agi dipeda orang taja dipandang pukul 7.00 pagi.
“Program tu digaga Sylvester William Awat enggau produksyen iya nya udah balat narit ati orang ngujungka sida enda leju meda program tu,” ku iya.
