Berekat ngemansangka tanah pesaka

Taja umur baru manggai 32 taun tang nya ukai nyadi penanggul ba Helmmy Bunyam ke udah mujur nyadi siku ari pekebun sawit dandang besai ari Lubok Antu lalu tau bendar nyadika chunto ngagai raban nembiak lebih agi ari menua pesisir ke endang mayuh tanah.

Penyampau sawit ke udah mujur ditumbuhka Helmy bisi 12,000 pun. Sekali ngembuah kebun sawit iya diatu ulih ngasilka urung 40 ngagai 60 tan. Enti bepelasarka rega sawit ke benung manah jam ke diatu iya nya bisi RM785 setan (ungkup Gred A) dia asil kebun iya ulih ngemansutka asil manggai RM94,200 dalam sebulan (dua kali ngembuah).

Peranak asal Rumah Norina, Munggu Jabang tu lebuh bekunsika pendiau diri madah iya kala ngasaika bemacham pemar enggau pemedis lebuh agi bekuli pengelama dua taun ba sebuah kompeni dibaruh Petronas agi beumur 19 taun.

“Maya gawa enggau kompeni tu, aku udah kala diberi tanggung pengawa nyadi Ketuai Tim lalu ngiring 140 iku staf bukai dalam kompeni tu.

“Ukai pengawa ti muntang dikereja asai ba aku maya nya laban ngasaika takah umur aku enggau staf bukai ke dijaga maya nya kelalu jauh bisi nya dua kali lipat umur aku.

KEBUN SAWIT HELMY…Rampa madang sawit Helmmy urung 200 ekar ke alai numbuh 12, 000 pun sawit.

“Dipuntangka enggau jaku sempama ‘makin peluh makin bekayuh, makin lelak makin berumpak’ dia aku mai ati berani nguji lalu nyanggup mangku pengawa nyadi ketuai kelimpah bebasaka tanggung pengawa ke dilempaika kompeni ngagai aku maya nya,”ku iya nusui mulaika pengingat diri.

MUPUK NUMBUHKA SAWIT

Ba sentang pengawa bekebun tu ku iya,buah runding numbuhka kebun sawit dandang besai tu tebantai maya ujung taun 2010.

“Maya nya, aku lama kemisi laban ti benung nganti kangau ari sebengkah kompeni ke bepalan ba Abu Dhabi.

“Sayau ke hari enggau jam tebasau ngapa ari ke ngereja pengawa nadai menuku dia aku berunding lalu nguji numbuhka kebun sawit dandang besai.

“Ngena puku dikemisi diri lalu bisi mega saup ari kami sebilik ke bukai, aku lalu berengkah numbuhka kebun sawit sepemesai 100 ekar tauka enti dikira pun bisi urung 6,000 pun.

Pengeran ati enggau semangat ti tinggi deka nyadi siku orang dagang betanam betupi ti mujur ditambah ke agi enggau pemujur bulih jali puku ari Bank Betanam Betupi (AgroBank) sepenyampau RM50,000 ungkup dikena nangkir kebun sawit nya.

KEBUN SAWIT HELMY…Rampa madang sawit Helmmy urung 200 ekar ke alai numbuh 12, 000 pun sawit.

“Terubah suba, semina dikereja kami sebilik aja kelimpah bisi pengereja pengawa tiga iku.

“Pengudah bulih jali ari AgroBank dia aku lalu nguji nangkir kebun tu besai ngagai 100 ekar iya nya nambahka 100 ekar ke udah ditumbuh sawit. Semua tanah ke alai aku bekebun tu endang tanah pesaka kami sebilik empu sereta bisi mega tanah tu dibeli ari orang bukai ti besemak ditu.

“Enggau ati ti baruh aku mai kitai sama ngemeranka pengawa betanam betupi tauka bekebun sawit dandang besai ngambi tanah puang pesaka aki ini kitai enda repa ngapa.

“Laban enti dikereja nengah chara enggau jalai ti betul sigi pulai ke penguntung ngagai kitai empu,”ku iya ke mega gawa nyadi Pemesai Khas Kaban Parlimen Lubok Antu,Jugah Muyang.

NGEMBUAH SAWIT…Bala pengereja pengawa benung kiruh munggahka tandan sawit ngagai lori sebedau dibai ke kilang.

Suara Sarawak