LINGGA: Chalun Parti Keadilan Rayat (PKR) N28 Lingga, Abg Kassim Abg Bujang udah nyikap diri enggau raban iya bejalai ba pelilih Lingga betemu sereta mendingka penusah rayat.
“Mayuh sida mantaika sebana madah diri agi tubah auska pemansang,” ku Abg Kassim
“Pengari sebedau tu tau dipadahka puntan megai Lingga laban nadai ulih ngemujurka pelin pemansang ti diperambu.
“Nya alai beri mih aku peluang ngemansangka Lingga ambika enda tinggal singkang pemansang,” ku Abg Kassim
Ku Abg Kassim mega pemansang ti deka digaga iya nyengkaum sukut pelajar, ekonomi enggau pekara rama.
Chalun PKR Abg Kassim taja ukai peranak asal Lingga tang iya kala gawa nyadi polis ba menua Lingga enggau Simanggang. Nya alai, iya ngasaika politik menua nya patut diubah.
“Pengundi mesti berunding enggau panjai lebuh milih chalun laban tiap iku chalun bisi pengelebih enggau pengelemi kediri empu.
Ba PRN-12, Abg Kassim Abg Bujang deka nyatup chalun baru Dayang Noorazah Awang Sohor ngarika GPS, Datuk Wan Abdillah Edruce Abdul Rahman (PSB), Baha Imam (PBK), Abang Ahmad Abang Suni (SEDAR) enggau Mohd Sepian Abang Daud (Independent).
