BELAGA: Peluang enggau perati mesti diberi ngagai peranak di Pelilih Menua Belaga ungkup pemansang.
Menteri Muda Elektrik Menua Pesisir Datuk Liwan Lagang madahka, penatai pemisi ti diulih ari dua tekat Bakun enggau Murum patut diberi baru ngagai peranak menua nya dulu.
Kenu ku iya, nya tanda basa ngagai peranak Belaga ke alai penatai pemisi ari dua tekat tu diengkah ngagai Tabung Amanah Bakun.
Tandu Liwan, Sarawak Energy Berhad ti ngempu tekat ulih meri bantu RM2 juta setaun ngagai tabung nya.
Iya madahka, bantu nya ila ulih dikena nganjung anak-anak ke sekula sereta dikena raban nembiak jeman ti deka datai.
“Nembiak kitai enda ulih sabar. Sida deka minta mimit pengulih ari dua iti projek tu.
“Kami ukai minta dibalas, tang kami deka jasa kami dikenang laban udah sanggup nerima projek tu diatur ditu,” ku iya.
Iya bejaku munyi nya ba Program Nasih Tanah Masegit Pelilih Menua Belaga enggau Bejadika Waterfront Belaga ti dipenyadika Kepala Menteri Datuk Patinggi Abang Johari Tun Openg ba laman Belaga ditu, kemari.
Adun Belaga nya madah, peluang gawa ba dua tekat tu mesti diberi ngagai peranak menua tu empu sebedau diberi ngagai peranak menua bukai.
Ku iya, peranak Belaga mega ngembuan mayuh juruteknik enggau injinir ke ulih gawa ba tekat nya.
“Pemansang ba palan kitai beri meh ngagai rayat kitai empu,” ku iya.
Sama bisi datai Sapit Kepala Menteri Tan Sri Datuk Amar James Jemut Masing, Menteri Muda Bekal Ai ti mega Menteri Muda Pekara Islam enggau DBKU Datuk Dr Abdul Rahman Junaidi, Kaban Parlimen Rajang Datuk Wilson Ugak Kumbong enggau Adun Murum Keneddy Chuk Pai Ugon.
