KUCHING: Direktor Opis Pekara Veteran Soldadu Malaysia (Sarawak) Mejar Pahot Joll minta ngambika raban veteran Iban Traker enggau Sarawak Renjer diberi elaun khas kelimpah bantu pekara berubat enggau pekara pemun.

Ku iya, raban veteran tu tebal agi udah tuai urung 70 ngagai 95 taun.

“Sida patut bulih pekara pemun baka bantu berubat enggau diberi rumah nyadika kelai sida diaku udah meri jasa ngagai menua.

“Aku mega ngarapka sida diberi elaun nyadika tanda basa,” ku iya.

Pahot bejaku munyi nya lebuh aum media pasal 17 iku penerima pangkat basa Pingat Perwira Negeri PPN (Engkeraju) Iban Trakers enggau Sarawak Renjer ba Opis Pekara Veteran Soldadu Malaysia (Sarawak) ditu, ensana.

Berebak enggau nya, Presiden Gerempung Veteran Soldadu Kor Renjer (PVTKR) Lt Kol (B) Mohd Melintang Abdullah madahka mayuh pemaik enggau pemujur udah dijapai raban Kor Renjer maya ngelindung menua tu kelia.

“Kami bisi nyelak sebuah bup dikumbai Iban Trakers enggau Sarawak Renjer ngambika ulih ditemu ngagai mensia mayuh kelimpah ngaga dokumentasyen pasal sida.

“Bisi dua buah bup agi deka dikeluarka iya nya pasal sejarah Kor Renjer enggau penyadi perang 1 Renjer di Katibas,” ku iya.