Beri kerejasama maya Operasyen Rabies

LIMBANG: Mensia mayuh kelebih agi peranak Kampung Long Sulung enggau genturung pendiau ngelingi nya dipinta meri kerejasama ngagai opis enggau ejensi perintah bejalaika Operasyen Rabies berengkah ari 10 ngagai 20 November tu.

Pengari Komuniti Penan Kampung Long Sulung, Francis Ngo madah, penyakit Rabies ari ukui ulih ngeruga pengerai mensia lalu peranak ditu dipinta seruran mendingka jaku gerah pasal operasyen nya.

“Penyakit datai ari ukui dikumbai Rabies ukai semina ulih ngeruga pengerai mensia tang mega ulih nabanka nyawa.
“Nya kebuah aku minta peranak ditu enggau sida ke diau besemak seruran bejaga enggau ngurung ukui sida ari bekedayau kandang 10 hari operasyen nya,” ku Francis.

Iya mansutka jaku nya lebuh dirandau pengudah ngulu Program Idup Bepengerai enggau Kimpin Sedarka Pengawa Nagang Rabies Pelilih Limbang, Hari Tiga tu tadi.

Siku agi peranak dia, Langit Ipang ari komuniti Kelabit Kampung Long Napir bekunsika penemu pasal penyakit Rabies tu ulih ngerampit ketegal diketup ukui.

“Ba penemu aku, penyakit Rabies tu endang tebal agi datai ari ketup ukui. Ai liur ukui ulih nyadi penyakit lalu nadai ubat ulih nipang kelimpah tau berampit

“Nya alai, kitai patut meri kerejasama rat ngagai raban bejalaika operasyen laban tu ungkup pengerai enggau pengelikun kitai mega,” ku Ipang bekunsika penemu diri.

Komuniti Kampung Long Sulung mega udah dibai mendingka empat licha dikenatai Opis Pelilih Kuching, Opis Pengerai Limbang, Ejensi Anti-Dadah Nasional (AADK) enggau Opis Servis Veterinar Limbang.

Pengawa Nyadung Poster enggau Brochure Penyakit Rabies ngagai Ketuai Raban Bansa Kampung Long Napir Joshua beserimbai enggau kimpin Operasyen Rabies Renggat Pelilih Limbang ti deka diatur berengkah sehari tu.