Beri pinchin nitih timpuh gawa

KUCHING: Sistem pinchin ke diberi ngagai Kaban Kunsil Nengeri (Adun) enggau Kaban Parlimen (MP) patut diserenih baru sebedau penemu nya deka diaduka raban pengereja pengawa perintah.

Ketuai Komunikasyen Parti Bansa Dayak Sarawak Baru (PBDSB) William Mangor madah, Adun enggau MP ke semina megai pengawa nya sepenggal aja patut dibayar pinchin nitihka timpuh nya nyema sida alah ba pengawa bepilih nangkan ke nya.

“Tu dikena nyeliahka Adun enggau MP bekenaka pangkat sida nyadi lisin kaya nyenyit.

“Pinchin patut diberi nitihka timpuh sida gawa ke rayat ukai nya sepemanjai umur,” pia ku iya madah nengah penerang media, kemari.

PBDSB mantaika penemu tu dikena nimbal penerang Ketuai Direkter Servis Perintah Borhan Dolah ti madahka perintah deka ngelimatka belanja nyentuk RM5 billion setaun enti ngena sistem kontrak ba orang gawa perintah ke baru nangkan ke tu ila.

Naka ke diatu, iya madah, peintah bekenaka belanja RM28 billion setaun dikena mayar ngagai orang gawa perintah ke udah pinchin.

William mega madah, orang gawa perintah gawa nyentuk tembu timpuh pinchin lalu nerima bayar pinchin nitihka atur.

“Penemu nyerenih baru bayar pinchin ngagai Adun enggau MP tu tau mega nyungkakka pemanah servis sida gawa ke rayat laban pangku pengawa sida ukai dipegai ketegal kuasa enggau nama,” ku iya nambah baru.

WILLIAM MANGOR

Suara Sarawak