Berita manah ke pemaik sekula

ROBAN: Sekula Primari (SK) Haji Junid semak Kampung Gerigat diatu udah manggai 56 taun entara sekula dirintai renggat keterubah projek nyeleti sekula repuk di Sarawak.

Berita tu mai pengelantang ngagai raban sekula nya taja diterima nengah aplikasyen WhatsApp.

Kepala Pengajar Jamel Razali madahka sida andal amat juluk deka nyadi nyata enda lama agi.

“Aku berasai lantang sereta meri terima kasih,” ku iya madah ngagai Suara Sarawak tadi.

Ku iya, ngelama tu sida semampai irauka pengelikun laban tebal agi begunan sekula udah repuk.

ENDA LIKUN … Gaya geladak kelas enda likun diguna

Taja pia ku iya, bisi berita manah diatu dikeandal deka mai pengelantang udah tu.

“Ke bendar aku semina ninga berita ngerimbas pending pasal 37 buah sekula repuk deka diseleti nengah aplikasyen WhatsApp kena Hari Tiga tu tadi.

“Naka diatu apin bisi penerang silik ari piak bekaul tauka Opis Pelajar Pelilih (PPD) Saratok.

“Nya alai, lebuh meda nama SK Haji Junid bisi dalam rintai 37 buah sekula deka diseleti, aku andal amat projek tu deka dipejalai enggau meruan sereta mujur.

“Kebuah pia laban beratika gaya langkar begunan sekula ti lama enggau enda likun dikena nembiak,” ku iya nerang.

REPUK … Daya pendiau begunan SK Haji Junid ti patut diseleti enggau jampat.

Ku Jamel nambah, ari pemisi projek nya nembiak mega deka berasai lantang, likun sereta ransing agi belajar lalu ulih matak mayuh agi nembiak besekula ditu.

“Pia mega penyikap perengka guna bukai ti disedia enggau meruan, kitai deka mujur nempa nembiak nyadi mensia ti menyana sereta sekula deka nyulut agi. Aku bisi amat pengandal,” ku iya nandu.

Ku Jamel, SK Haji Junid ditumbuh dalam taun 1963 ba tanah 4.23 ekar pemesai lalu berengkah dibuka April 1963 ke alai sekula nya diatu bisi 180 nembiak.

Pia mega ku iya, begunan lama siti luntang endang udah repuk amat lalu semina diseleti nengah pengawa beripai ketegal enda tetangkupka penyampau tubuh nembiak ti majak nambah.

Hari Tiga tu tadi, Opis Kepala Menteri Sarawak ba sebengkah penerang berita madahka pejalai projek nya dipelaba diatur nyentuk ujung taun tu ngaul agih belanja penyampau RM1 bilion.

Nitih ku penerang nya, 35 ari 37 sekula repuk nya datai ari sekula primari enggau dua buah sekula sekondari.

SK Nanga Gayau mega disengkaum dalam rintai nya kelimpah ari SK Haji Junid ungkup Bagi Menua Betong.

Suara Sarawak