BETONG: Mensia mayuh dipinta nganjung diri berubat enggau lengkas taja semina ngembuan kelai ti enda balat ari empas kena rampit Covid-19, ku Datuk Amar Douglas Uggah Embas.
Sapit Kepala Menteri ke mega Chairman Komiti Penyangga Penusah Nengeri (JPBN) nya madahka nya utai ti beguna lalu patut digaga dalam timpuh pengerekai pandemik di Sarawak maya tu.
“Sida ti ngembuan kelai baka renga, batuk enggau pedis rekung tau beperesa chulit tauka ngelawa sepital tauka klinik ti semak.
“Pengelengkas pengawa nya deka nyelamat diri empu lalu ngurangka kes orang ke nadai dibai ngagai sepital tauka Brought In Dead (BID) ari rumah panjai enggau sitak menua pesisir,” ku iya.
Iya bejaku munyi nya sepengudah betemu enggau Pegawai Opis Pengerai Bagi Betong Dr Johnny Pangkas maya berandau senentang program pelajar pengerai ditu, kemari.
“Peranak rumah panjai nyengkaum di menua pesisir patut nganjung diri berubat enggau jampat taja semina ngembuan kelai pengerai ti enda balat.
“Pelajar enggau lalau pengerai tu amat beguna ngagai mensia mayuh awakka sida tau lengkas agi beperesa di klinik enti ngembuan kelai kena rampit,” ku iya.
Uggah madahka iya irau ati bekaul pekara nya ensana sepengudah bisi kes BID dirikodka ditu enggau ba Pusa.
