Berubat lengkas enti nyema diketup jelu

“Nengah chara nya, sida ke udah kena ketup ulih diselamat.”

KUCHING: Sida ke udah kena ketup tauka keramak jelu baka ukui, mayau enggau kera patut berubat jampat ngagai Klinik Rabies ba sepital ke semak.

Sapit Kepala Menteri Datuk Amar Douglas Uggah Embas madahka nengah chara nya, sida ke udah kena ketup ulih diselamat.

“Diatu, perintah benung bebendar nagang penyakit rabies ke nuntung menua kitai,” ku iya.

Iya madah munyi nya pengudah nerima berita siku orang ti mati ketegal rabies.

Penusah nya ngerikodka kes ke-20 mati ketegal rabies.

Ku Uggah, nitihka penerang ari Opis Veterinar Nengeri di Mukah, lelaki ke beumur 64 taun nya diketup siku ari dua ukui iya ti diiru iya ari kaban belayan iya di Sibu kenaka 21 Mei tu tadi.

“Ripot madahka iya diketup ukui nya lebuh iya benung meri sida makai.

“Taja udah diasuh berubat ketegal ari abi ketup nya, tang iya madahka nya enda balat lalu kena 6 Ogos baru iya nganjung diri berubat ngagai Sepital Bintulu.

“Taja pia, kena 19 Ogos tu tadi, lelaki nya diripotka mati lebuh benung berubat ba Intensive Care Unit,” ku iya.

Uggah ti mega Chairman Komiti Pengatur Penusah Nengeri madahka iya nya tadi engka enda mati ketegal rabies enti iya nitihka jaku lalau ari orang ke ngasuh iya berubat.

“Aku nandu tu baru… pengudah kena ketup, abi ketup diberesi enggau sabun lalu tejuka ai masu abi nya pengelama 10-15 minit.

“Udah nya, iya patut nganjung diri berubat, enda ngira abi nya balat tauka enda,” ku iya nandu.

Kelimpah ari nya, iya madahka ba kes ti udah kala nyadi ke alai sida ti berubat ba klinik pengudah kena ketup ukui nya gerai.

“Kitai endang bisi perengkaguna kena berubat,” ku iya.

Uggah mega madah, nitihka rikod ari Opis Pengerai, kes kena ketup ukui enggau mayau ba menua tu mengkang tinggi, iya nya purata entara 40 ngagai 60 kes sehari.

“Nya alai aku ngelalau semua rayat ba menua tu, enti ulih seliahka diri ari kena ketup jelu tu.

“Sekali agi, enti kita ka ngiru sebarang ukui, kita patut beratika ari ni penatai ukui nya sereta nemu kemaya ukui nya udah kala divaksin tauka bedau,” ku iya nerang enggau silik.

Enti ukui nya apin divaksin, anjung ngagai klinik veterinar enggau naka pengelengkas, ku iya madah nyemetak.

Iya mega mansutka ati ti tusah laban taja mayuh udah lalau diberita ba surat kabar, radio enggau media rama, tang agi bisi orang ke bebadi nyawa ketegal enda nitihka lalau nya.

Suara Sarawak