Besabar, isu Petronas ulih teputar

“Kitai bisi chara kediri empu mutarka penanggul tu ke alai Perintah Sarawak deka berunding enggau Perintah Besai pasal pekara tu enda lama agi.”

SIBU: Utang Petronas enggau Perintah Sarawak ulih diputar dalam kandang dua bulan tu lalu aku ngarapka rayat ba nengeri tu ulih besabar, pia ku Kepala Menteri Abang Johari Tun Openg.

“Kitai bisi chara kediri empu mutarka penanggul tu ke alai Perintah Sarawak deka berunding enggau Perintah Besai pasal pekara tu enda lama agi.

“Petronas enda mayar chukai ngagai kitai kenyau bulan Januari tu tadi,” ku iya rambau Sesi Townhall begulai enggau peranak Sibu ditu, ensanus.

Taja pia, Abang Johari andalka penanggul tu ulih diputar.

“Perintah Besai patut bebasaka hak kitai laban Sarawak ukai sebarang ngasuh mayar chukai tang kitai nitihka undang-undang lebuh bejalaika chukai nya.

NGAMATKA SEMAYA… Abang Johari madahka diri ukai semina pintar bejaku aja tang deka ngamatka semaya lalu mayuh projek udah enggau benung dipejalai ba menua tu.

“Kitai nadai salah laban chukai nya ulih mansutka penatai pemisi tambah ngagai menua Sarawak,” terang iya.

Abang Johari besemaya enti umur agi panjai, iya deka ngamatka semaya nyengkaum nagih chukai ke apin dibayar sida.

Kenu ku iya, Sarawak udah mansutka asil minyak enggau gis penyampau RM660 billion kenyau ari taun 1976 ngagai 2018 tang semina nerima RM33 bilion aja.

“Shell, Murphy Oil da Pertamina udah mayar chukai sida ngagai kitai lalu semina Petronas aja ke bedau mayar,” tambah iya.

Ngelansa pekara bukai, iya enda setujuka penemu sekeda piak ti madahka iya semina landik bejaku aja.

Nambahka nya, pekara dirunding iya semina deka ngemansangka Sarawak nyadi nengeri pemadu maju ba Malaysia manggai taun 2030.

Nya kebuah, iya chukup beratka teknologi ngagai bala rayat ba nengeri ngambi ulih sama ngemansangka diri ngena perengkaguna ti udah disedia ngagai sida.

“Endang amat kitai beguana awak bejalaika sebarang pekara lalu enda nyadi tekala nya. Nya kebuah kitai patut merambu sebedau sebarang pekara ulih mujur dipejalai.

“Enti umur aku agi panjai, aku deka ngamatka semaya laban aku ukai semina landik bejaku aja tang deka bejalaika pekara nya.

“Mayuh pekara disemaya aku ngelama tu udah dipejalai enggau mega benung dipejalai,” ku Abang Johari.

Iya meri jamin, Perintah Sarawak diatu tegap enggau ulih matak mayuh agi pemeranak puku datai ngagai menua tu.

Ambika banding, pemeranak puku ari Amerika Syarikat udah beranakka puku ba menua tu penyampau RM32 billion.

“Lebuh ngembuan perintah enggau menua ti tegap ekonomi, pekara tu ulih matak pemeranak puku laban sida andalka puku nya deka likun.

“Nya meh pekara besai dikena kitai nyungkak ekonomi menua tu,” ku iya nyemetak madah.

Ngelansa pekara bukai, iya udah beratika sekeda pemansang ti deka dipejalai ditu.

Tu nyengkaum perambu ngaga litar lumba, ngaga baru tebing Batang Igan, ngagaSibu Moden and Smart City ba Jalan Oya, ngaga sekula entarabansa enggau Taman Gadung.

Urung 1,000 iku ari mayuh serap umur enggau komuniti udah ngulu pengawa nya lalu bisi mega sida mantaika tanya maya pengawa nanya enggau nyaut.

Randau tu diatur moderator Abang Fairul Syarmil Abang Mohd ti mega Chairman Gerempung Graduet Bumiputera Sibu (PGBS).

Sama datai Menteri Muda Pelajar, Sains enggau Pansik Teknologi Dr Annuar Rapa’ee, Kaban Parlimen Petra Jaya Dato Sri Fadillah Yusof enggau Residen Bagi Menua Sibu Charles Siaw.

Suara Sarawak