Besabar, semua bela ampit disadung sengkabung mua

MIRI: Sepenyampau 84,382 bungkus sengkabung mua pechuma deka disadung ngagai tiap Ketuai Bilik (KIR) ba Bagi Menua Miri nengah chara berenggat.

Nitihka sebengkah penerang kemari, Komiti Penyangga Penusah Ngenyit (JPBN) Bagi Menua Miri mega minta 15,000 bungkus sengkabung mua agi ngambi disadung ngagai KIR ba bagi menua tu laban penyampau rumah ti nambah ba mengeri Miri.

“Bisi 57,434 bungkus sengkabung mua benung disadung ngagai genturung pendiau enggau rumah setinggan ngagai KIR ba pelilih Miri kelebih agi ba mengeri tu.

“Pengawa nyadung sengkabung mua tu dipejalai nengah kerejasama Ketuai Komuniti enggau Ketuai Raban Bansa Pelilih Miri enggau Pelilih Mit Bario ngagai peranak ba sitak nya penyampau 38,071 bungkus, 17,507 bungkus ungkup Kaunsil Mengeri Miri (MBM) nengah komiti peranak ba sitak nya sereta Opis Tanah enggau Survei Bagi Menua Miri deka nyadung 1,856 bungkus sengkabung mua ngagai rumah setinggan,” ku iya nerang.

Nambahka nya ku iya, Ketuai Komuniti enggau Ketuai Raban Bansa Pelilih Miri enggau Opis Tanah enggau Survei Bagi Menua Miri udah berengkah nyadung sengkabung mua nya kena 25 April tu tadi.

“Pengawa nganjung 1,198 bungkus sengkabung mua ungkup Pelilih Mit Bario ari Miri udah berengkah dipejalai kemari enggau Opis Pelilih Mit Bario deka nyadung sengkabung mua nya ngagai peranak dia.

“Pia mega, bisi 4,557 bungkus udah disua ngagai Opis Pelilih Marudi, 11,008 bungkus ngagai Opis Pelilih Subis, 6,080 bungkus ngagai Opis Pelilih Telang Usan enggau 5,302 bungkus ngagai Opis Pelilih Beluru,” terang iya silik agi pasal pengawa nyadung bungkus sengkabung mua tu.

Nitihka penerang, pengawa nyuaka sengkabung mua ba pelilih nya deka dipejalai piak Opis Pelilih empu enggau kerejasama Ketuai Komuniti enggau Ketuai Raban Bansa.

Peranak Miri dilalau semampai nitihka atur enggau tagang ari piak perintah sekumbang timpuh Atur Tagang Pejalai (PKP) tu nentuka Miri lepas ari Covid-19.

Ungkup peranak ti bedau nerima sengkabung mua nya dipinta besabar enggau meri kerejasama nentuka pengawa nya lanchar dipejalai.

Sebarang tanya bekaul pengawa nyadung sengkabung tu, mensia mayuh ulih telefon ngagai Bilik Operasyen Penusah Ngenyit Bagi Menua Miri ba lumur 085-322737 tauka MBM, 085-433501.

Suara Sarawak