KUCHING: Menteri Muda Ba Opis Kepala Menteri (Undang-undang, MA63 enggau Kaul Sarawak-Perintah Besai) ti mega Chairperson Biro Indu Gerempung Nyeliah Dadah Malaysia (Pemadam) Datuk Sharifah Hasidah Sayeed Aman Ghazali madah chara mensia mayuh bekaul enggau perintah beguna dalam mantu raban nya.
“Kitai mesti bekaul enggau perintah nengeri nguna chara ti holistik ari sukut mantu enggau mulaika pemanah ulah sida (gian dadah).
“Tu nyengkaum mantu ruang bilik sida, pengidup, ngulihka pengawa, nyambung sekula tauka bantu bukai,” ku iya.
Sharifah Hasidah bejaku munyi nya lebuh ditanya pemberita pengudah nutup Program ‘Lets Talk With Women Pemadam’ di Pustaka Nengeri Sarawak ditu, kemari.
Iya meri chunto, mensia mayuh ulih bekerejasama enggau raban orang ti kala gian dadah tu ngulihka penatai pemisi enggau ngajar sida ngatika diri awakka sida ulih meri pemaik ngagai mensia mayuh baru.
“Chara tu ngambika sida enda asai diri dikemeluka. Kitai mega anang enda ngaga ripot nyema bisi nemu sida ke gian dadah.
“Lawa ruang bilik ungkup mantu sida ari mayuh sukut pekara ti diguna mega beguna awakka ruang bilik nganjung anak tauka orang ti dampih enggau sida berubat jampat,” ku iya.
Berebak enggau nya, Direktor Ejensi Benchi Dadah Nasional (AADK) Iskandar Turkee madahka genturung pendiau Matang nyadi palan angat di Kuching ti deka digadungka sida ba pengawa salah guna dadah.
“Ungkup Bagi Menua Kuching, kami ngelala genturung pendiau Matang enggau palan besemak nyengkaum sitak Petra Jaya mesti digadungka.
“Kami ngatur mayuh program begulai enggau mensia mayuh mungkur perintah nengeri, ejensi perintah enggau perintah besai awakka palan angat tu ulih digadungka.
“Entara bukai pengawa ti diatur iya nya ngemayuhka program nyeliahka enggau program mantu sida ti deka berubat,” ku iya.
