Besaup mutar penanggul indu belaki kelalu biak

KUCHING: Gerempung ukai dikuasa perintah (NGO) raban indu Sarawak patut tegap agi penemu ba pekara tikas umur nirika ruang bilik ngagai 18 taun.

Menteri Pengintu Pengelantang Pendiau, Komuniti, Orang Indu enggau Pemansang Anak Mit Datuk Seri Fatimah Abdullah madahka diri bisi pengandal NGO ulih mantu Opis Indu enggau Ruang Bilik (JWKS) nambahka penemu sentang raban indu kelebih agi sida belaki agi biak.

“Di Sarawak, bisi tiga bengkah pekara ungkup nirika ruang bilik iya nya nengah sivil, undang-undang Syariah enggau Adat.

“Genap pekara tu mega bisi penanggul enggau empas iya empu ngagai sida,” terang Fatimah.

Iya mansutka jaku nya lebuh nutup Randau NGO Raban Indu Sarawak ba sebuah hotel tebilang ditu, kemari.

Ku iya, sida ti nirika ruang bilik nengah sivil, tikas umur 18 taun tang pemendar khas diberi ngagai indu ke udah betubuh bisi biak ari 18 taun.

“Rayat udah diberi pemendar ba pekara tu lalu kami nguji deka bejalaika sekeda atur nyadika malin sebedau ngemendarka sida tu belaki tumu.

“Indu belaki kelalu biak engka bedau ulih nyendiaka diri napi pemedis beranak lalu tu meri pemar ngagai sida enggau anak.

“Kelimpah ari nya, kitai dekaka sida nembuka pelajar, abis nadai Pom Lima lebuh umur manggai 17 taun.

“Enti sida kelalu tumu belaki, sekula mega deka tejanggal ngujungka sida napi penanggul maya ngiga kereja dikena melanja ruang bilik enggau belanja sida empu,” ku Fatimah madah nyemetak.

Suara Sarawak