Besaup mutar penanggul, ukai ngulihka publisiti aja

SRI AMAN: Semua piak patut ngembuan tanggungpengawa ngemansang lalu mutarka penanggul ukai dikena ngulihka publisiti.

Menteri Muda Pengelantang Komuniti Datuk Francis Harden Hollis madah pekara nya lebuh ngabas palan diperambu ngaga projek jematan St Lawrence Sabu, kemari.

Kenu ku Harden, mensia mayuh patut ransing pasal baka ni chara nyaup mutarka penanggul tu.

“Ari kitai nyalahka sebarang piak ketegal penanggul bebida politik, manah kitai ngiga chara nyaup mutarka penanggul tu, ” ku iya.

Harden ti mega Adun Simanggang madah, jematan St Lawrence Sabu ti dikena ngelayang ngagai Sungai Sabu diatu digaga ari jematan kayu lalu deka diganti ngena jematan besimen.

Injinir Unit JKR Sri Aman Bujang Kanang enggau Pemantu Injinir Unit Shahbudin Abu Bakar mega bisi nyereta pengawa matau perambu ngaga projek jematan besimen nya.

Kelimpah ari nya, raban ti matau taba perambu ngaga jematan gantung enggau titi di Rumah Sherit Tambun, Titikah, Batu Lintang Undop.

Ba penemuai tu, sida udah nemu endur ngaga jematan gantung ba Rumah Rangga Angkom Sungai Tenggak enggau Rumah Japing Gema, Nyakai Jalai Paip.

NGABAS TABA PROJEK…Menteri Muda Pengelantang Komuniti Datuk Francis Harden Hollis maya ngabas taba projek begulai enggau piak JKR Sri Aman.

 

DEKA DIGANTI…Pendiau titi ba Rumah Serit, Titikah ke deka dikemanah perintah.