Betong deka terus maju – Uggah

Entara langgur pemansang digaga perintah projek Agropolitan Bukit Sadok enggau sitak tibang pemakai

“Kitai patut berasai temegah laban 95 peratus sitak (Betong) udah nerima bekal karan enggau ai.”

BETONG: Sapit Kepala Menteri Datuk Amar Douglas Uggah Embas nyadaka pengandal ati iya nya Bagi Menua Betong deka terus maju lalu mansang ke mua kelebih agi nengah langgur Perintah Sarawak ti deka ngaga pemansang mungkur Agropolitan Bukit Sadok enggau sitak tibang pemakai.

Ku iya, 2019 tu meh pengerami makai taun ke-17 Betong diangkat nyadi Bagi Menua ba nengeri tu lalu nunjukka pemansang ti nyadi ungkup pengelantang semua.

“Kitai patut berasai temegah laban 95 peratus sitak (Betong) udah nerima bekal karan enggau ai.

KELAI GAWAI… Uggah enggau bala temuai ke bukai ngaga pengawa ‘ngeradak ka ai pengayu’ rambau Pengerami Makai Lemai Gawai Dayak Renggat Bagi Menua Betong ti diatur di Balai Raya Lumba Tan Sri Datuk Amar Stephen Kalong Ningkan, pukul 12:00 tengah malam. -Gambar OSMAN RAZALI

“Kelimpah mayuh perengka pelajar udah disedia lalu kitai ngembuan mayuh orang ke profesional.

“Pia mega, penyambung jalai alun majak manah enggau perintah chakah ngambika semua sitak ba ditu bulih tiang komunikasyen ke manah.

“Nyengkaum sehari tu perintah benung ngiga chara dikena nyapai pemansang projek Agropolitan Bukit Sadok enggau kawasan bakul makanan.

“Kitai patut beterima kasih, sebuah sitak ke mit suba ulih dikemansangka. Kitai nemu langgur enggau program strategik Perintah Gabungan Parti Sarawak (GPS) Bagi Menua Betong deka terus mansang ke mua,” ku iya.

Iya ti nyadi Menteri Betanam Betupi Moden, Tanah Adat enggau Pemansang Kandang Menua madah bakanya rambau bejadika Pengerami Makai Lemai Dayak Renggat Bagi Menua Betong diatur di Balai Raya Lumba Tan Sri Datuk Amar Stephen Kalong Ningkan, lemai kemari.

KENANG TAUN TU… Bala anak ti nerima insentif nembiak nyulut begambar kenang enggau bala temuai ti dipebasa.

Bela datai Penyanding Penemu Sains Pansik Negeri Datuk Patinggi Tan Sri Alfred Jabu Numpang enggau bini iya, Kaban Parlimen Betong Datuk Robert Lawson Chuat,Kaban Kaunsil Nengeri (Adun) Layar Gerald Rentap Jabu, Sekretari Politik Kepala Menteri Dr. Richard Rapu, Residen Bagi Menua Betong Friday Belik, Direktor Kolej Vokasional Betong ti nyadi Chairman Komiti Induk Pengerami Lim Ah Juan sereta Pemesai Pelilih Betong Sofhi Jebal.

Ba semua pemansang tu ku Uggah, ex Sapit Kepala Menteri Datuk Patinggi Tan Sri Alfred Jabu Numpang disikap nyadi arkitek pemansang ngembuan tanggungpengawa ke beguna amat lebuh meri mayuh bantu di Betong.

Nangkanka nya, ku iya nambah, Perintah Sarawak diatu benung ngiga chara ngambika Sarawak ulih nyadi nengeri ti ngembuan penatai pemisi ke tinggi ba taun 2030.

“Tu juluk ati Kepala Menteri Datuk Patinggi Abang Johari Tun Openg.

“Nengah sektor betanam betupi lalu Sarawak deka nyadi pemun pengawa eksport maya nya ila.

“Nya alai, rayat di Bagi Menua Betong ukai semina meda aja tang patut chakah mungkur dalam semua program perintah lalu perintah deka mantu sida,” ujarnya.

Beserimbai enggau pengerami Gawai Dayak enggau Hari Raya Aidilfitri ke deka datai enda lama agi, iya ngelalau bala rayat di nengeri tu ngambi terus ngenegapka penyerakup enggau nyaga kaul enggau pangan diri.

“Kitai meseti nyaga penyerakup enggau pengelantang raban bansa ngambika semua langgur enggau perambu pemansang ulih lanchar dipejalaika.

“Nambahka nya, kitai patut nulak piak ti nguji deka nyerara kitai di Sarawak,” ku iya madah nyemetak.

Uggah lebuh nyebut pasal pengawa nyukat tanah nitihka Seksyen Enam madah, inisiatif tu ukai deka ngerampas tanah rayat baka ke ditusui piak bukai.

Iya mega meri bantu RM40,000 dikena ngatur pengerami Gawai Dayak taun tu. Kelimpah Robert enggau Rentap mega meri bantu kediri RM30,000.

Bisi 56 iku nembiak nyulut dalam Ujian Pencapaian Sekolah Rendah (UPSR), Pentaksiran Tingkatan Tiga (PT3), Sijil Pelajaran Malaysia (SPM) dan Sijil Tinggi Persekolahan Malaysia (STPM) nerima insentif maya nya.

Uggah mega nyuaka bantu pekayan sekula ari Yayasan Sarawak ngagai 960 iku nembiak pelajar penyampau RM192,000 ungkup Pelilih Betong.

Suara Sarawak