Betulung ngemansang pangan diri

KUCHING: Guna peluang ngelakuka produk nengah gerempung, ku Kaban Kunsil Nengeri (Adun) Telang Usan Dennis Ngau.

Iya madahka ngelakuka barang nengah gerempung ulih ngaga kaul ti manah entara komuniti dalam ngenataika servis ti patut.

“Penau ti dikembuan raban bansa Dayak di menua tu patut disukung entara komuniti dalam ngemansangka ekonomi kitai empu.

“Nya alai guna meh peluang ti bisi dalam ngelakuka produk kita nengah gerempung kelimpah ngerembaika kaul dagang,” ku iya.

Dennis bejaku munyi nya lebuh ngulu Pengerami Alem Pemung Kuman Ka Usey (Pengerami Makai Lemai Begulai di Ruai) ba Balai Gerempung Dayak Bidayuh Nasional (DBNA) ditu, ensanus.

Ku iya, kelimpah pekara ekonomi pekara pelajar sekula nembiak mega patut diperati enggau meruan.

“Aku nadai nemu chara bukai dalam nyapai penyulut kelimpah ari pemandai besekula.

“Rebak kitai diatu ngempu tanggungpengawa ti berat dalam meri pekara pelajar ti meruan ngagai bala anak.

“Kitai nadai chara bukai dalam ngetanka adat ti nyulut enti enda sama betulung mantu komuniti kitai empu,” ku iya.

Tambah iya, bansa Dayak patut meri empas ti positif ngagai nembiak ngambika seruran mantu nembiak ti seranta enggau kurang penatai pemisi kelimpah meri insentif ngagai nembiak ti nyulut ba pekara pelajar.

Pengerami makai lemai tu diatur Gerempung Kenyah Nasional Sarawak pampang Kuching mega bisi meri insentif penyulut ngagai lapan iku nembiak ti nyulut ba PT3 enggau SPM.

Sama bisi datai Chairman Gerempung Kenyah Nasional Sarawak pampang Kuching Lukas Kalang, bala komiti enggau bala bukai.

NAMA BERITA?…Dennis Ngau betabi enggau bala ti bisi datai. GAMBAR RAMIDI SUBARI

Suara Sarawak