Bini dijamah, ringat enda dikemendar bebini baru

MARANG: Siku bini ti nadai bekereja bakal selampur tubuh pengudah ditendang laki iya laban enggai meri kerejasama ngemendarka laki iya ti minta bebini baru.

Lebuh penusah nyadi ba rumah sida urung pukul 8 malam, indu ke berumur 29 taun nya ditendang baka bol lalu mua iya dibungkur laki iya ke berumur 41 taun nya ngena pua.

Nitihka penerang sebedau penusah nya nyadi, seduai endang udah belaya pengudah iya keran enda ngemendarka laki iya bebini baru.

Sebedau nya ku penerang, saspek bisi minta indu nya nyuaka salin kad pengelala iya lalu mai tiga iku anak seduai ngagai Opis Agama pelilih Marang ngambika ngatur peminta pengawa iya ke ka bebini baru nya.

“Indu nya enggai nyuaka dokumen ke dipinta iya laban endang enda ngemendarka iya bebini baru.

“Ketegal pedis ati ngagai indu nya, saspek ringat lalu ngerampas telefon binching ke dipegai indu nya.

“Tekenyit ketegal ulah saspek, indu nya nyabak sebedau mua iya dibungkur ngena pua lalu ditendang lelaki nya,” ku iya lebuh dirandau Sinar Harian, kemari.

Penerang madahka indu nya mega nusi pekara nya kala nyadi sebedau tu tang enda ngaga ripot polis laban irauka pengelikun diri empu enggau bala anak iya.

Taja pia, ketegal enda tan seruran diperinsa, iya mutuska diri ngaga ripot polis kelimpah ngena nya nyadi malin di Kort Syariah.

Berebak enggau nya, Ketuai Polis Pelilih Marang, Deputi Superitendan Mohd Zain Mat Deris lebuh dirandau Sinar Harian ngaku nerima ripot nya.

Ripot nya diatu benung dipansik nitihka Seksyen 323 Kanun Keseksaan enggau Seksyen 18A Akta Keganasan Rumah Tangga 1994.

Suara Sarawak