BINTULU: Atur Mindah Betagang Belebas (PKPB) enggau Atur Pengawa Standard (SOP) deka diterit ba Bagi Menua Bintulu berengkah ari tengah malam 14 April tu tadi nyentuk 27 April tu.
Menteri ti megai tanggung pengawa Komiti Penyangga Penusah Bagi Menua Bintulu (JPBB), Datuk Sri Dr Stephen Rundi Utom madahka atur tu diterit beduduk ari kes positif Covid-19 nambah ngenyit ba bagi menua tu.
“Kami agi nitihka SOP nengeri tang mesti nelebaka diri nitihka pekara ke nyadi ditu,” ku Rundi.
Rundi ti mega Menteri Utiliti mansutka jaku nya ngagai pemberita pengudah betuaika Aum BDDMC, ditu ensanus.
Nengah SOP baru nyentuk 27 April tu, semua aktiviti ekonomi semina deka dikemendar dibuka ari pukul 6 pagi nyentuk 8 malam.
“Taja pia, farmasi agi ulih dibuka nyentuk pukul 10 malam.
“Kedai kopi enggau restoran enda tau endur makai lalu mensia mayuh semina dikemendar tapau aja,” terang iya.
Rundi madah, atur nya mesti dipejalai ngambi nagang pengerekai Covid-19 ba Bintulu ari majak nambah baka di Sibu.
Iya nyemetak madahka timpuh 14 hari nya beguna amat nentuka Bintulu ulih mukaska kes ti ari berampit dalam komuniti.
“Kami ditu nyau suntuk kereban berubat nyengkaum staf kami, Unit Sakit Raya (ICU), PKRC enggau palan kuarantin.
“Baka ni kami deka mutarka penusah tu enti majak mayuh agi kes positif Covid-19?” ku iya.
Rundi madah, PKPB enggau SOP diterit pengudah semua pengari rayat, raban terabai komuniti enggau BDDMC setujuka pekara tu.
Ku iya, gelumbang ketiga Covid-19 berengkah ba Bintulu sebedau ngerekai ngagai pelilih bukai di Sarawak lalu Bintulu diatu nyau napi kes Covid-19 ke majak nambah.
“Kitai udah meda sekeda opis udah ngerikod kes baka Laku, Opis Bekal Ai Menua Pesisir (JBALB) enggau Opis Pos.
“Kami minta semua orang meri kerejasama laban bisi raban mit enda setujuka SOP tu,” ku Rundi nyemetak madah.
Nitihka statistik kes enggau kena rampit, Rundi madahka sida minta Komiti Penyangga Penusah Nengeri (JPBN) netapka sekula ba mengeri bejalaika pengawa ngajar enggau belajar nengah online seraya sekula ba menua pesisir tau nurun ke sekula.
“Enti sekula ba mengeri, kitai nadai pilih bukai lalu kami deka minta ngagai Direktor Opis Pelajar Nengeri neruska pengawa belajar nengah online.
“Enti siti sekula nya ditemu bisi kes, pekara tu tau ngenataika penusah ngagai semua orang,” terang Rundi.
Rundi madah, atur peresa chulit sebedau tama ke Bintulu ti deka abis kena 18 April tu engka deka dilanjar nyentuk haribulan baru ke deka dipadah ila beduduk ari kes Covid-19 ditemu majak nambah.
“Kami udah ngelala 20 iku ari Sibu ditemu positif Covid-19 sebedau tama ke Bintulu.
“Uji kita berunding, sida ti ditemu positif tu engka udah dalam komuniti kitai enti kami enda neritka atur peresa chulit sebedau tama ke Bintulu tu,” ku iya nerang baru.
Ku iya, perintah benung beratika mayuh pekara sebedau neritka SOP lalu ketegal pekara ekonomi, mayuh palan enda bepekul.
Sama datai Kaban Parlimen Bintulu Datuk Seri Tiong King Sing enggau Chairman JPBB ti mega Residen Bagi Menua Bintulu, Jack Aman Luat.
