SEBAUH: Pangku pengawa biro indu ba genap rumah panjai enggau genturung pendiau mesti ditegap ngambi meri pemaik ngagai semua peranak kelebih agi raban indu.
Menteri Utiliti, Datuk Sri Dr Stephen Rundi Utom madahka raban indu mesti nyingkang sebaka enggau Komiti Pemansang enggau Pengelikun Genturung Pendiau (JKKK) nentuka pengawa dipejalai berurun.
Pia mega ku iya, profil rumah panjai mesti dikemaru ngambika bala temuai nemu penerang baru pasal peranak enggau peminta sida.
Rundi ti mega Adun Kemena mansutka jaku nya rambau Pengerami Pemesai Begulai Enggau Rayat sereta Pengerami Makai Taun Ke-15 Biro Indu Rumah Raymond Plen di Sungai Gelam Sebauh, kemari.
Terang iya, biro indu mega bempu tanggung pengawa besai baka JKKK lebuh ngatur pengawa indu ba rumah panjai.
Nambahka nya ku Rundi, biro indu bempu pangku pengawa ngatur pengawa raban indu sereta bidang ekonomi ke ulih dikemansang orang indu dikena nambahka penatai pemisi sida sebilik.
Berebak enggau nya, iya minta biro indu chakah agi ngatur pengawa ti ulih ngangkat enggau negapka raban indu kelebih agi dalam ekonomi rama enggau atur rumah panjai ti udah dilempai ngagai sida.
“Biro indu ngembuan tanggung pengawa ngemansangka raban indu ba rumah panjai enggau genturung pendiau kelimpah negapka pangku pengawa sida ba jeman moden nipakka pemansang menua,” ku Rundi.
