Biro Indu Rh Jubang, Sebangki Panjai beripai sanitasyen rumah panjai

LUBOK ANTU: Pengawa beripai nyembur semua kandang rumah panjai enggau clorox dikena bejejaga sereta nyeliahka pengerekai penyakit Covid-19 ba Rumah Jubang, Sebangki Panjai ditu patut dichunto rumah panjai bukai.
Penyanding Penemu rumah panjai tu Edwin Raoh madah, Biro Indu Rh Jubang bela sepenemu beripai nyembur clorox ba kandang rumah panjai tu ngena belanja ari biro indu sida empu pagi tadi.
“Nyadi pengawa tu baru sekali udah dipejalaika Biro Indu kami pagi tadi beduduk ari kes Covid-19 ke bisi ditemu nyadi ba Rh Panjai Buie enggau Rumah Panjai Bara.
“Berebak enggau nya, kami serumah udah baum kena malam 13 Januari tu tadi lalu ngaga pemutus enda ngemendarka sebarang orang luar tama ngagai rumah panjai tu nyentuk 31 Januari tu.
“Pia mega, kami serumah mega ditagang sesegau ngapa pansut ari rumah panjai enti nadai kebuah ke berat,” ku iya maya dirandau Suara Sarawak tadi
Nangkan ke nya, Edwin mesan sida serumah ke gawa ba pelilih menua bukai lebih agi ba kandang menua ke ulih kena rampit penyakit dikearapka anang guai pulai ke menua ba timpuh ke semak tu.
Ba pemutus aum sida serumah mega, ku Edwin sida udah sepenemu deka ngaduka pagar rumah panjai meruan agi dikena nagang penatai orang luar ke nadai dikemendar ungkup pengelikun peranak rumah panjai.
Udah nya, semua orang tuai ke beumur lebih 70 taun enda disagi duduk sebelah ruai dikena nentuka pengelikun sida.

Edwin Raoh

 
Raban Biro Indu Rumah Jubang, Sebangki Panjai benung bejalaika pengawa nyembur clorox ba ba mua laman rumah panjai sida.

Suara Sarawak