Bisi 13 pemberita Sarawak deka dulu dituchuk vaksin Covid-19

KUCHING: Bisi 13 iku pemberita veteran ari nengeri tu entara penerima vaksin Covid-19 renggat keterubah sehari tu nyentuk 31 March tu.

Pekara tu beduduk ari Serakup Pemberita Sarawak (FSJA) minta ngagai Komiti Penyangga Penusah Nengeri Sarawak (JPBNS) berundingka pemberita ti mega raban gawa ba luan enggau diperunding nerima vaksin renggat keterubah di menua tu.

“Nya kebuah, media ngembuan tanggung pengawa besai ngenataika penerang ari perintah ngagai rayat.

“Raban pemberita patut nyadi raban keterubah nerima vaksin nya laban kami bejalaika pangku pengawa ba luar,” terang Presiden FSJA, Jacqueline Radoi David.

Vaksin keterubah selamat sangkai ba Kuching kena Hari Tiga tu tadi ba kargo Padang Bilun Entarabansa Kuching.
Direktor Opis Pengerai Nengeri, Dr Chin Zin Hing madahka urung 40,000 iku raban gawa ba luan di Sarawak deka nerima vaksin Covid-19 renggat keterubah program tu.

Renggat kedua ngaul orang tuai beumur 60 taun enggau tuai ari nya sereta sida ke bisi penyakit baka kemi manis enggau tinggi darah.

Renggat ketiga ngaul orang tuai beumur 60 taun enggau biak ari nya sereta nadai penyakit raya.

Raban pemberita ti apin dituchuk vaksin, nama sida deka dipasuk dalam renggat kedua enggau ketiga program nya lalu pekara tu deka dipadah JPBN silik agi.

Kelimpah ari nya, sida diperansang rejister nengah aplikasyen MySejahtera.

Suara Sarawak