Bisi 13 projek PJLB udah tembu

KUALA LUMPUR: Bisi 13 ari 64 projek jalai menua pesisir (PJLB) ti dikemendar dalam Langgur Pemansang Malaysia Lumpar Ke-11 (RMK-11) ba Sarawak udah tembu digaga.

Sapit Menteri Pemansang Menua Pesisir II, Datuk Henry Sum Agong madahka 39 projek agi ba renggat nyiri perunding langkar projek, tiga projek ba renggat tender enggau semilan benung dipejalai.

“Opis menteri mega udah ngemendarka empat projek jalai ngelawa genturung pendiau beungkus RM1.57 juta di Parlimen Kota Samarahan ungkup taun 2020.

“Naka bulan Oktober tu tadi, dua ari projek nya udah tembu seraya dua projek agi benung dipejalai,” ku Henry.
Henry mansutka jaku nya lebuh nyaut tanya ba Aum Parlimen, ditu ensanus.

Iya nyaut tanya Rubiah Wang (GPS-Kota Samarahan) pasal pejalai projek enggau perambu baru opis menteri nambahka penyikap infrastruktur menua pesisir baka bekal ai, bekal kuasa karan, perengkaguna enggau jalai penyambung ba Kota Samarahan.

Bekaul perengkaguna, Henry madahka tiga projek beungkus RM1.25 juta udah dikemendar ba Parlimen Kota Samarahan ungkup taun 2020.

Naka 25 Oktober tu tadi, iya madahka siti ari projek nya udah tembu lalu dua agi benung dipejalai.

Nambahka nya ku iya, perintah udah ngagihka belanja ungkup projek bekal kuasa karan menua pesisir Sarawak dalam taun 2020.

Terang iya, agih belanja nya dikena bejalaika 16 bengkah projek nyambung kuasa karan ngagai 3,200 rumah.-BERNAMA

Suara Sarawak