KUCHING: Bisi 14 iku pemekit mujur masuk renggat final Pekit Belagu Online Sada Nyawa Serakup Pemuzik Dayak (SPD).
Sida tu mungkur 10 iku indu enggau empat lelaki iya nya Jenivie, Fredo, Resman, Roseline, Esther, Vannesa, Camaiellya, Shenoora, Moggie, Felitity, Natalie, Hansie, Cindy enggau Debbie Nia.
Tuai Pengatur Program Sada Nyawa Renggat Keterubah, Dawie Tamang Raja madah, batang tuju pekit tu diatur dikena ngiga sida ke ngembuan sada nyawa pemadu manah ngambi diambi nyadi penanyi baru.
Maya dirandau Ruai, Suara Sarawak, Dawie madah SPD deka ngiga raban orang biak ke bisi pengelandik enggau penyelai iya empu ari sukut patah nyawa.
“Champion ari pekit tu ila deka mansutka lagu digaga komposer tebilang ba Sarawak baka Depha Masterpiece, Tony Engkabi enggau Avalanche Studio.
“Kami sebuat teulihka runding ngatur pekit belagu online baka tu ari buah runding Sapit Presiden, Beritin Empawi lalu penemu iya tadi disukung semua kaban komiti SPD.
“Pengawa kami tu mujur nyentuk diatu berekat sukung ari kaban komiti baka ari Bintulu, Miri, Kuching enggau Sibu.
“Tambah mega, kami deka ngiga orang baru dalam industri muzik Dayak tu lalu tu mega sebagi ari chara kami mai bala bukai nitihka atur ditetapka perintah iya nya, diau ba rumah,” terang iya.
“Pekit tu deka ngiga siku orang ke bepenau mai gelar champion sereta ngembuan patah nyawa ke manah tang iya nadai kala diberi peluang mantaika pengelandik diri.
“Engka rebak biak tu enda nemu pelasar mantaika pengelandik diri, nya kebuah kami sebuat keran deka ngiga orang baru nentuka industri muzik Dayak tu majak angkat baka industri muzik ari menua bukai.
“Berindik ari pengerekai igi penyakit Covid-19, kami sebuat berundingka pekit tu endang enda ulih diatur chara betemu mua ngujungka pekit tu diatur nengah virtual.
“Bala pemekit deka ngerikod video benung belagu kediri empu ari rumah enggau bela diau ba rumah aja kelai nitihka Atur Pengawa Standard (SOP).
Dawie madah, taja napi mayuh penanggul baka enda ulih betemu enggau bala pemekit tang sida sebuat keran deka nempa penanyi baru ngambi nampung sereta ngangkatka industri muzik Dayak tu ngagai tikas ke tinggi agi.
Iya mega madahka pemisi teknologi digital udah ngemuntangka sida sebuat bejalaika pengawa tu enggau lanchar taja semina betunga mua enggau bala pemekit nengah online aja.
NGANSAH PENGELANDIK BELAGU
Nangkan ke nya, Dawie madahka sida natak penyampau tubuh bala pemekit tang sida nutup bala bukai masuk pekit nya pengudah meda lebih ari 100 video manah dikirum bala pemekit.
“Chukup gaga pengawa dipejalai kami sebuat nerima mayuh sukung lebuh kami nerima lebih ari 1,000 iku ke deka masuk pekit tu.
“Kebuah pia laban enda nyangka nerima penyereta ngemayuh nya.
“Bisi sida ke deka masuk pekit tu ari Semenanjung Malaysia, Sabah, Brunei lalu bisi mega ke benung gawa ba tasik.
“Enti nitihka ati, sigi deka diraup tauka dibai kami magang bala pemekit tu ngambi ulih mantaika pengelandik sida nengah pelasar tu tang naka nya aja diulih kami,” ku iya ngenang pemanah timbal ari mensia mayuh ungkup pekit tu.
Dawie mega madahka sida merambu pekit tu diatur pengelama tiga minggu laban nerima mayuh sukung belanja enggau tepa.
Iya madah, entara raban ke udah mantu ari sukut belanja enggau tepa ngagai pekit belagu tu iya nya Jasa Tubak Enterprise, D’Crystal, Mellz Empire, D’Cottage Cafe, Remang, Masterpiece, Tangkai Sera Kafe enggau Lemambang Lemai P&K.
Raban bukai nyengkaum LA Beauty’s Secret, Sailor’s Cafe & Bistro, Teresang Smoke House, Cap Mayau Printing, T&S Recording Studio, Telaga Corp RJ Pork Burger, ND Beauty Empire, Ryn’s Beta enggau MV Empire.
“Kami mega nerima timbal enggau sukung ke chukup manah ari mensia mayuh lebuh penerang keterubah dibantai kami ba media rama udah dipeda lebih ari 300, 000 iku.
“Nya kebuah, kami ngasaika pekit belagu online tu udah ditemu sereta disukung mensia mayuh.
“Bala penanyi mega meruan nyukung pengawa kami baka Melissa Francis, Leezwita, Menoah Hudson, Stevenson, Hailey, Dayana Shini sereta bala bukai.
“Sida udah nyaup like enggau komen video bala pemekit dataika renggat semifinal tu kelai nyukung pengawa ngansah pengelandik bala pemekit tu.
“Nitihka perambu, pekit tu diatur nengah empat renggat baka Top 55, Top 26 enggau renggat kepenudi milih 14 iku pemekit.
“Terubah ngatur pekit tu, semua sida diasuh nganjung ngagai group Telegram ke disediaka kami.
“Dia mega endur kami milih sida ke dipeda landik enggau nitihka atur ditetapka kami ngambi dipujur masuk Top 55.
“Pekit tu mega disukung 7D Music Association (Kapit) enggau baka pemelanja ke udah disebut aku tadi,” ku tandu Dawie.
NERIMA TIMBAL POSITIF
Ngelansa pasal atur pekit renggat keterubah, iya madahka sida nerima 673 video ngambi dipilih masuk Top 55 ke alai renggat tu dipilih akim betuaika Dawie empu, Danny Lang Enserami, Johnny, Weelee Tamang Raja, West Lock And Load, Inkie Kunatak, Jimmy Siden enggau Harry D’crystal.
Nyadi, ari Top 55 ngagai semi final tauka Top 26 enggau renggat final, sida dipilih akim betuaika Depha Masterpiece, Will Masterpiece, Tony Engkabi enggau Beritin Dcrystal.
Udah nya ari Top 26 enggau renggat final (Top 14) nya mega dipilih bepelasarka 40 peratus undi ari mensia mayuh ba media rama.
Ku iya, undi ari mensia mayuh iya nya ‘like’ enggau ‘react video’ mega deka dikira sida.
“Pemenang pekit tu deka nerima perais mata duit RM1,000 enggau bepeluang nyadi penanyi digaga raban SPD sereta deka nerima tepa.
“Lumur dua enggau tiga deka nerima RM500 enggau RM300 sereta bela disempulang enggau tepa.
“Nya alai, pajakka sukung ngagai pemekit ke dikerinduka kita,” ku Dawie.
