KUCHING: Sepenyampau 165 iku atlit para kontinjen Sarawak deka masuk Para Lumba Malaysia (Para Sukma) 2022 diperambu berengkah ari 1 ngagai 6 November tu di Lembah Klang.
Menteri Pemansang Orang Indu, Anak Mit enggau Pengintu Pengelantang Komuniti, Datuk Seri Fatimah Abdullah madah, semua rintai nama udah dianjung ngagai komiti pengatur lumba nya.
Ku iya, naka diatu semua atlit dikemegah Saraak benung belatih begulai enggau jurulatih sida.
“Ungkup latih kepenudi ila, kami deka ngempung semua atlit para Sukma nengah sebengkah program khas ti dikumbai ‘countdown’ (ngitung hari) kena 2 September tu,” ku iya.
Fatimah mansutka jaku nya ba aum pemberita Aum Kaunsil Pemansang Orang Indu enggau Ruang Bilik Sarawak (MWKS), kemari.
Ngelansa silik, Fatimah madahka maya program ‘countdown’ ila, pengawa meri jaku peransang deka diatur begulai enggau lima atlit para Sarawak ke udah nempa nama ba Lumba Komanwel Birmingham 2022 sereta Lumba Para Asean 2022 di Solo, Indonesia.
Ku iya, tu dikena meri semangat ngagai atlit para Sukma kontinjen Sarawak nempa penyulut ba lumba Sukma ke deka datai.
“Kelimpah ari Bonnie Bunyau, kami mega deka ngangauka Muhammad Nur Syaiful Zulkafli, Mohd Adib Iqbal Abdullah, Fraidden Dawan enggau Wiro Julin ke udah nempa pemujur ba lumba dipasuk sida empai lama.
“Kami deka ngangauka sida pulai ke Sarawak enti ulih ngambi sama ngulu program ‘countdown’ kelimpah ngerami pemujur sida.
“Pia mega, nama sida udah dianjung ngagai Perintah Sarawak ngambi meri insentif ke penyulut sida,” ku Fatimah.
Ungkup rikod, Bonnie Bunyau mujur nempa nama nyadi pemenggi midul emas Lumba Komanwel ba kategori angkat berat para di Birmingham seraya Muhammad Nur Syaiful Zulkafli, Mohd Adib Iqbal Abdullah, Fraidden Dawan pemenang emas ba lumba nyemerai enggau Wiro Julin ba main nimbakka laja Asean Para Games di Solo, Indonesia.
