SARATOK: Urung 300 iku pemekit udah rejister masuk Pekit Kumang Gawai Online 2021 Trofi YB Datuk Ali Biju.

Tuai Koordinator Pekit, Seman Endoi madah, ari penyampau sida nya semina 100 iku aja dipilih masuk renggat keterubah.

“Kami bala komiti enggau akim tadi (kemari) udah milih 100 iku (Top 100) pemekit ari 300 iku ke ngisi pom masuk pekit ti haribulan kepenudi rejister abis kemari (4 June).

“Sida 100 iku tu deka belabuh dipandang ba page YB Datuk Ali Biju empu kena pukul 7 lemai pagila, 6 June (sehari tu) lalu bala peminat tauka Followers pemekit kumang deka like sida nya.

“Sapa ka bulih pemadu mayuh like entara 50 iku pemekit deka dipilih masuk renggat kedua Top 50 ke alai sida deka dipinta mantaika video catwalk ngena ngepan awakka bala mayuh ulih milih baru bagi sida ke masuk renggat kepenudi, Top 10,” terang iya nyentuk lebuh dirandau Suara Sarawak, kemari.

Seman madah, 10 pemekit tu ila mega dipinta mantaika pengelandik diri ba main asal kitai Iban lalu nerangka reti rambai jaku pekit kumang, Besaup Mekuh Ka Adat Enggau Main Asal Dalam Arus Pemansang.

Ari nya tadi, sapa empu video ti nerima like pemadu mayuh, nya mih deka menggi gelar Kumang Gawai Online 2021 Trofi YB Datuk Ali Biju ti keterubah lalu nerima perais mata duit RM5,000 sereta perais ke bukai.

“Ngambika semua nemu, penyampau like diulih bala pemekit ba tiap renggat enda dibai ngagai renggat nangkan nya.

“Like dikira naka nya aja. Abis ba renggat nya aja. Berengkah renggat baru, undi baru nya mih diambi nyadika mark,” ku iya madah nyemetak.

Ke penerang, Pekit Kumang Gawai Online 2021 tebuka ngagai indu dara ke berumur entara 18 ngagai 30 taun ari raban bansa Dayak peranak menua Malaysia.

Indu dara nya mesti agi rumpas tauka apin kala belaki lalu Komiti Pekit enda melanja ungkus ke dikena masuk pekit tu baka ungkus nyendiaka ngepan tang masuk pekit tu nadai bebayar.

Penerang ti silik tau betanya ngagai Seman empu ba lumur 013 5642202 enggau Koordinator Pekit, Leslley Kalom ba lumur 014 9994904.