KUCHING: Bisi 98 kluster Covid-19 agi benung ngerekai di Sarawak nyengkaum tiga kluster baru ke baru ditemu iya nya Kluster Quadruplex Lapan Enam Miri, Kluster Kevok Telang Usan enggau Kluster Jalan Baru Tatau-Bintulu, Tatau.
Komiti Penyangga Penusah Nengeri (JPBN) dalam siti penerang media sehari tu madahka Kluster Quadruplex Lapan Enam ngaul sebuah komuniti ti ditemu ari unit rumah flat ba Permyjaya, Miri.
Kluster tu berampit ba peranak ti diau dia ari pemindah rama sereta kaul rat ngujungka 20 kes positif Covid-19 dirikodka.
Kelimpah ari nya, Kluster Kevok ditemu ari sebuah komuniti ti endang benung bejalaika Atur Mindah Betagang Bepekul (PKPD) di Kampung Long Kevok, Telang Usan.
Ari kluster tu, bisi 280 iku diperesa ke alai 58 iku ditemu positif Covid-19. Kluster ti kepenudi iya nya Kluster Jalan Baru Tatau-Bintulu ditemu ari sebuah palan gawa ngaul sebuah kuartes pekereja serikat ti diasuh bejalaika PKPD di Jalai Baru Tatau-Bintulu.
Bisi 66 iku diperesa Covid-19 ke alai 22 iku ditemu positif.
Semua sida ti dirikodka ari tiga buah kluster tu udah dipindahka ngagai sepital enggau palan kuarantin ungkup diperubatka.
Nangkan nya, penerang tu madahka bisi lima buah palan diasuh bejalaika PKPD berengkah 21 enggau 23 June.
Lima buah palan tu iya nya Rumah Majeng Kampung Po Ai Sri Aman, Rumah Kedeni Kampung Batu Besai Sri Aman, Rumah Mengga, Kampung Batu Besai Sri Aman Kuarters Pengereja Pengawa Balingian Power Generation (BPG) Jalai Sibu-Mukah, Mukah enggau Rumah Gabriel Ikau Sungai Lepah Tanjung Manis.
