Bisi kebuah enda nerima MPKK

KUCHING: Rayat Sarawak enda patut nerima elemen luar ti nguji deka ngachau penyerakup ba menua tu.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka elemen ti nguji deka ngeruntuhka struktur organisasyen baka Komiti Pengatur Genturung Pendiau (MPKK) ulih ngachau pengelikun ba menua tu.

“Penumbuh MPKK ba menua tu ulih ngachau pengelikun sereta pengelantang ba menua tu, nya alai Perintah Sarawak enda nerima MPKK dipejalaika ba menua tu.

“Kitai endang nulak pengawa ngachau pengelantang ba menua tu. Enda patut dua iku berebut ngemudi siti kapal?” ku iya.

Fatimah madah munyi nya lebuh pengerami Sejambak Kasih beserimbai enggau Hari Deepavali 2019 ba sebuah hotel tebilang ditu, kemari.

Nangkan nya ku iya, polisi Opis Pengelantang Komuniti (JKMS) endang beratika pengelantang enggau pengelikun nyadi ba komuniti ba menua tu.

“Nya alai kami ari JKMS meri bantu nitihka guna ruang bilik tauka siku orang,” ku iya.

Ku Fatimah, nitihka Skim Bantu JKMS berengkah ari Januari ngagai September taun tu, sepenyampau 56,693 iku nerima bantu ninting bulan di Sarawak.

“Ungkus bantu belanja ke diberi ngagai sida tu sepenyampau RM150,326,230.

“Lalu ba JKMS Bagi Menua Kuching, sepenyampau RM26,769,700 bantu diberi ngagai 9,716 orang ke nerima bantu ninting bulan berengkah ari bulan Januari ngagai September taun tu,” ku iya nerang.

Rambau pengerami nya, bisi 50 iku patut nerima bantu ari JKMS tang semina 41 iku aja sida ke ulih datai nerima bantu ari sukut mata duit enggau hamper.

Fatimah mega madahka sida ke enda ulih datai ngagai pengerami nya, bantu mata duit deka diberi nengah akaun bank sida.