Bisi projek besai ungkup Kpg No. 6

KUCHING: Projek besai deka dikemansangka ngambika ulih ngemanahka agi rampa menua genturung pendiau di Kampung No.6 Jalai Datuk Ajibah Abol ditu.

Pekara nya dipansutka Kepala Menteri Datuk Patinggi Abang Johari Tun Openg, tang enggai mansutka projek nya enggau silik.

“Bisi projek dipejalaika ba ditu, taja pia aku enda mansutka nya dulu laban pekara tu agi dalam perambu.

“Udah tembu ila, baru aku madahka pekara nya lalu tu deka ngemanahka agi rampa menua lebih agi ari Kampung No.6 tu nyentukka Kampung No.3 sereta mandangka pesaka asal Melayu ba ditu,” ku iya.

Iya mansutka pekara tu rambau Pengerami Begulai Aidilfitri Kampung No.6 di Masjid Darul Hana Patingan ditu, kemari.

Berebak enggau nya, Abang Johari mega minta Sistem Infomasyen Sarawak (SAINS) numbuhka siti akaun khas dikena Masjid Darul Hana Patingan awakka Sarawak Pay ulih ngemuntangka mensia mayuh meri bantu ngagai masjid nya.

Tu beduduk ari inisiatif Masjid Darul Hana Patingan ti nyadi masjid keterubah di Sarawak ngena aplikasyen Sarawak Pay.

Sama bisi ngulu pengerami nya bini Abang Johari, Datuk Amar Juma’ani Tuanku Bujang, Yang Dipertua Masjid Islam Sarawak Datuk Misnu Taha, Chairman Lembaga Amanah Kebajikan Kaum Muslimin Kampung Patingan Datuk Abdillah Abdul Rahim sereta Chairman Masjid Darul Hana Patingan Zamhari Hashim.

BEJADI…Datuk Patinggi Abang Johari Tun Openg bejadika Sarawak Pay ungkup Masjid Darul Hana beserimbai enggau Pengerami Aidilfitri Kampung Patingan Kuching malam kemari- Gambar Gazhali Bujang.