BKSS 5.0 kelai penyiru perintah – Dr Madeline

KUCHING: Bantu Khas Sarawakku Sayang (BKSS) 5.0 nya kelai penyiru Perintah Sarawak mantu ngelempung tating belanja rayat sekumbang pandemik Covid-19 tu.
Felo Akademi Sains Malaysia Datuk Dr Madeline Berma madahka BKSS ti dipejalai nya meri pemaik ngagai raban B40, raban gawa ba luan sereta pedagang mit enggau jelan pemesai.
Pia mega ku iya, tu nyengkaum sida ke gawa dalam sektor dagang temuai enggau perengka pengangkut.
“BKSS udah dipejalai ngambi mantu raban diselinting ba Sarawak maya Atur Mindah Betagang (PKP) diterit ketegal Covid-19,” ku iya nerang.
Dr. Madeline ti mega Pemikir Ekonomi madahka BKSS dipejalai nengah mayuh chara baka bantu mata duit, pinjau mudah nadai bungai enggau diskaun elektrik sereta ai.
“Lebuh bejalaika BKSS, mayuh inisiatif dipejalai ngambi tuai bilik ulih bebelika barang enggau ngena perengka guna lebuh nyendiaka diskaun tauka dikelaung mayar chukai,” ku Dr Madeline.
Iya madahka BKSS 5.0 nya nya nampung BKSS 1.0 nyentuk BKSS 4.0 ba menua tu lebuh lima pakej peransang ekonomi ti dilancharka Perintah Besai.
“BKSS 5.0 tu mega beguna amat nentuka bantu ulih diberi ngagai raban ti tusah jam diatu.
“BKSS mega udah dilanchar enggau nadai mayuh kelikuh,” ku iya.
Ke rikod, Perintah Sarawak udah bejalaika BKSS 1.0, BKSS 2.0, BKSS 3.0 ngena agih belanja lebih RM2.55 bilion, BKSS 4.0 ngena agih belanja RM104.84 juta seraya BKSS 5.0 ngena agih belanja RM405 juta.