Bomba disempama terabai menua

BAU: Pengiruh enggau pengelelak raban gawa di luan patut dikenang lalu dibalas nengah kerejasama rat enggau ngasika atur ti dipejalai.

Sapit Menteri Pengawa Bekebun enggau Komoditi, Willie Mongin madah, Opis Bomba enggau Penyah Penusah Malaysia (JPBM) nyadi sebagi ari raban gawa ba luan ti terubah ngesah ngagai endur penusah nyadi.

Ku iya, sida tu tau dikumbai terebai menua ke nyadi raban keterubah mantu mensia mayuh enggau menua kitai nagang pengerekai igi penyakit Covid-19.

“Raban bomba bejalaika pangku pengawa sida enggau chukup manah dataika sida nerima jaku puji ari menua luar ketegal penyikar enggau pengeliat ati gawa.

“Nya alai patut endar kitai temegah enggau ngenang jasa raban bomba ti udah berambunka nyawa diri empu lebuh bejalaika operasyen,” ku iya.

Willie mansutka jaku nya lebuh nyuaka pemeri kereban enggau perengka sanitasyen ngagai Ketuai Balai, Tawang Lingem ba Balai Bomba enggau Penyah Penusah Bau ditu tadi

Balai Bomba enggau Penyah Penusah Bau udah nerima kereban enggau perengka ungkup bejalaika sanitasyen ba sekula pelilih menua nya.

Berindik ari Atur Pejalai Penyuman (PKPP) berengkah dipejalai kemari, iya minta rayat Malaysia ngasika Atur Pengawa Standard (SOP) ti udah ditetap.

Suara Sarawak