Bonnie Bunyau mechahka rikod dunya

KUCHING: Atlit Para Menua, Bonnie Bunyau Gustin udah mechah rikod dunya ba Pekit Angkat Berat Dunya Fazza Dubai Ke-11 di Emiriah Arab Bersatu (UAE), ditu kemari.

Pemujur Bonnie, peranak asal Kampung Baru Mawang, Serian ukai semina ngemegah nama Sarawak tang mega Malaysia laban udah mai pulai midul emas.

Bonnie ke mega anak Sarawak mujur ba angkat berat 230 kilogram (kg) dalam kategori lelaki atas 72 kg.

DATUK SERI REEZAL MERICAN NAINA MERICAN
Menteri Nembiak enggau Lumba
“Temegah ati enggau pemujur Bonnie laban udah mai pulai emas sereta nempa rikod dunya ke baru! Meri pengaga ati enggau pemujur Bonnie ke udah ngemegah nama Malaysia. Tu mih kuasa atlit kitai, kuasa atlit Malaysia!”

Ba pemujur tu, Bonnie ukai semina mai pulai midul emas tang iya udah madamka rikod dipegai atlit Iran, Roohallah Rostami ti udah nempa sejarah angkat pemerat 229 kg ba Lumba Para Asia Jakarta, Indonesia ba taun 2018.

Pia mega, atlit China, Peng Hu bulih midul pirak enggau angkat berat 214 kg seraya Nnamdi Innocent ari Nigeria bulih midul engkeraju (213 kg).

Bonnie udah nempa dua pemujur taun tu pengudah bulan nyin kemari, iya udah mai midul emas ngagai kitai ba Pekit Trofi Angkat Berat Dunya di Bangkok, Thailand.

Ba pekit diatur ba Bangkok nya, atlit beumur 22 taun nya mujur bulih emas ba angkat berat 226 kg.

Iya mujur ngalahka atlit Nader Moradi ari Iran ke bulih pirak (204 kg) dientudi Alexander Daskov ari Kazakhstan ke bulih engkeraju (140kg).

DATUK SERI NANCY SHUKRI Menteri Dagang Temuai, Seni enggau Main Asal “Pemujur anak Malaysia tu ba renggat entarabansa endang ngasuh kitai temegah ati. Bonnie udah nyadi peransang ngagai semua kenyau ari suba nengah pemujur ditempa iya. Meri pengaga ati ngagai Bonnie Bunyau Gustin ke udah nempa rikod baru dunya ba Pekit Angkat Berat Dunya di Dubai. Enggau peluang tu mega, aku meri pengaga ati ngagai atlit bukai ke udah nempa nama ba tikas entarabansa enggau ngemegah nama Malaysia. Tu nyengkaum Kisona Selvaduray ti nyadi champion Pekit Badminton Entarabansa Sepanyol 2021, Connie Chu Kang Ni ti bulih midul emas ba Pekit Kejohanan Olahraga Qasanov di Almaty, Kazakhstan. Sama mega enggau Lee Hup Wei bulih midul emas ba pekit lompat tinggi di Pekit Atletik Peringatan Qosanov di Almaty, Kazakhstan sereta Syarifuddin Azman menang dalam Moto3 Junior World Championship. Nuju bala atlit menua, tempa mih mayuh agi pemujur ungkup diri empu, kita sebilik enggau mega menua tu.”

 

DATUK ABDUL KARIM RAHMAN HAMZAH
Menteri Dagang Temuai, Seni, Main Asal, Nembiak enggau Lumba
“Meri pengaga ati ngagai atlit para angkat berat kitai, Bonnie Bunyau Gustin ti udah mechah rikod dunya ba kategori Lelaki 72 kg di Pekit Angkat Berat Dunya Fazza Dubai. Atlit Sarawak beumur 22 taun tu udah nyadi champion ba kategori angkat berat 230 kilogram (kg) ngalahka atlit ari menua China, Peng Hu ti bulih midul pirak enggau angkat berat 214 kg seraya atlit ari Nigeria, Nnamdi Innocent bulih midul engkeranju enggau angkat berat 213 kg. bonnie mega udah madamka rikod lama dipegai atlit ari menua Iran, Roohallah Rostami. Sama mih kitai meri pengaga ati ngagai Bonnie laban udah ngemegah nama menua.”

 

GERALD RENTAP JABU
Adun Layar
“Meri pengaga ati ngagai anak Sarawak, Bonnie Bunyau ti udah bulih midul emas sereta nempa rikod baru dunya ba Pekit Angkat Berat Dunya di Dubai. Chukup temegah ati enggau pemujur enggau penyulut nuan ba lumba tu.”

Suara Sarawak