MUKAH: Jaguh angkat berat Para ari Sarawak, Bonnie Bunyau Gustin deka nerima insentif khas pengudah iya mujur teulihka midul emas dalam Lumba Paralimpik Tokyo 2020, pagi tadi.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka sebedau terebai ngagai Tokyo, atlit para menua bisi betemu enggau Kepala Menteri Datuk Patinggi Abang Johari Tun Openg nengah aum virtual.

“Kepala Menteri kala madahka Perintah Sarawak deka meri insentif ngagai atlit Para Sarawak ti mujur teulihka midul ba pekit tu.

“Pengudah aum nya, sida berasai teperansang sereta besemangat nyapai pemujur,” ku iya.

Fatimah bejaku munyi nya lebuh ditanya pemberita di Palan Penyulut Teknikal Sarawak (Centexs) Mukah ditu, tadi.